Залуусын эхлүүлсэн жагсаал төв талбайд хоёр дахь өдрөө үргэлжилж байна. 24tsag.mn жагсаалд оролцож буй залуусын үзэл бодлыг сонслоо. Тэдний зарим нь цайны цагаараа ирж,  зарим нь багш нарынхаа зөвшөөрлөөр хичээлээсээ ирж оролцож байна. Тэд ийн хэлэв.

С.Энх-Амгалан, хувиараа бизнес эрхлэгч \Сүхбаатар дүүрэг\

Ард түмэн хэмнээд маш удлаа, туйлдаа хүрлээ. Миний зогсож байгаа байдал бол ард түмний үнэн төрх, бид шинэ хувцас ч авч чадахгүй байна. Хэн ч хичээнэ гэж хэлж чадна. Залууст тодорхой үр дүн, шийдвэр хэрэгтэй байна. сонгууль бүрт сайхан зүйлс хэлээд гарч ирдэг. Гэтэл дарга нар машинаас машины хооронд суухдаа амьдралаас хэтэрхий хол тасарсан байна. Юмны үнэ ямар байгааг мэдэхгүй, амьдрал мэдэхгүй байна.

Хэмнэх мөнгө ч алга, үсээ ч засуулж чадахгүй байна.

С.Сэнгэравдан, 52 настай \Баянзүрх дүүрэг\

Ахынх нь хувьд залуус дүү нараа дэмжиж энэ жагсаалд оролцож байна. “Ажлаа хий” гэдэг маш зөв уриалга. Төрийн байгууллага ч бай, төр засаг ч бай шат шатандаа өөрсдийн ажлын хариуцлагатай хийвэл нийгэм цэвэршинэ гэсэн агуулгатай гэж ойлгож байгаа. Өнөөдрийн үнийн өсөлт манай гэр бүлийн хүнсэн дээр гэхэд илт харагдаж байна. Өмнө нь 100 мянган төгрөгөөр 20 хоногийн хүнсээ цуглуулдаг байсан бол одоо арай гэж 14 хоногийн хоолонд хүрнэ. Гэхдээ өмнөх чанараа яагаад ч гүйцэхгүй...

Б.Цэрэннамжил, 31 настай \Баянзүрх дүүрэг\

Ерөнхий сайдын хэлсэн үгэнд итгэхгүй байна. Хэн ч энэ үгийг хэлж чадна, төрд итгэхээ болиод удлаа. Энэ жагсаалыг үр дүнтэй болох хүртэл тэмцэнэ, ингээд хоосон орхихыг хүсэхгүй байна. Биднийг НӨАТ-ын буцаан олголтоор амьдарч байна гэж хэлсэн нь үнэхээр том доромжлол байсан. Миний хувьд нэг улиралд 50 мянга орчим төгрөгийн буцаан олголт авдаг.

Ахиад ийм тэнэг юм битгий яриасай гэж хүсч байна.

Б.Мөнхжаргал

Миний хувьд залуу гэр бүлээ дэмжээч ээ гэдэг үзэл бодолтой байгаа. Тиймдээ ч өчигдөр оройн 04.30 цаг хүртэл жагссан, тэр хүртэл эмх замбараагүй байдал болоогүй байсан. Гэтэл дугуйтай байхад жийж унагаад бариад явсан, 60 орчим залуусыг барьсан гээд байгаа. Өнөөдөр ирэхэд манай найз бид хоёрын дугуй алга болчихсон байна. Өчигдрийн барьсан хүмүүс дунд 13 настай Э гэдэг хүү ч байсан. Тэр хүүхдийг яасныг мэдэхгүй байна. Гэр бүлд нь өгсөн бол уу яасан бол.

Би 800 мянган төгрөгийн цалинтай, гэвч нэг өрөө байрны сарын түрээс 850 мянган төгрөг байна.

Ы.Аимжан \АШУҮИС, IV курс\

Үнийн өсөлт хэрээс хэтэрлээ. Оюутнууд бидэнд ч  нөлөөлж байна. Өмнө нь аав ээжийнхээ өгсөн 100 мянган төгрөгөөр хангалттай хоол хүнсээ авдаг байсан. Гэтэл одоо энэ мөнгөөр төмс, луувангаас хэтэрч чадахгүй байна.

Нэрээ нууцлав

Миний хувьд цайны цагаараа ирж жагсаалд оролцлоо. Авилга, албан тушаалын гэмт хэрэг, хууль шүүхийг чангатгах хэрэгтэй байна. Мөн дээрээс нь үнийн өсөлт хэрээс хэтэрлээ.

Э.Ананд \ШУТИС-ын оюутан\

Гурван ширхэг таван төгрөг, хоёр тасархай 00-ын цаастай тэнцэж байна. Ээж аавын минь үед 20 мянган төгрөгөөр уут дүүрэн хүнстэй ирдэг байсан бол одоо үед 100,200 мянган төгрөгөөр ч уут дүүрдэггүй. Би ийм ирээдүйг хүүхдүүддээ үзүүлмээргүй байна. Тиймээс хүүхдийнхээ төлөө жагсаалд оролцож байна.

Т.Мөнхжаргал