Орон нутгийн хөгжлийн сангийн хөрөнгөөр 2023 онд хэрэгжүүлэх төсөл хөтөлбөрийн талаар иргэдийн санал асуулгыг улсын хэмжээнд өнөөдрөөс авч эхэлсэн талаар мэдээлэл хийлээ. Мэдээлэлдээ "Төсвийн хуулийн дагуу 2013 онд анх удаа Орон нутгийн хөгжлийн санг бий болгож уг сангаас аймаг, нийслэлд хуваарилдаг болсон. Улсын төсвөөс буюу Орон нутгийн хөгжлийн нэгдсэн сангаас аймаг нийслэлийн ОНХС-д 2013-2022 онуудад нийт 1.5 их наяд төгрөгийг хуваарилсан. Харин 2022 онд улсын хэмжээнд 253.4 тэрбум төгрөг төвлөрснөөс 28.6 тэрбум нь нийслэлд хуваарилагдсан. Нийслэлийн санал асуулгыг 2018 оноос Швейцарын хөгжлийн агентлагийн санхүүгийн дэмжлэгтэй хэрэгжиж буй Азийн сангийн Хотын засаглалыг сайжруулах төсөл нь Нийслэлийн Засаг даргын тамгын газартай хамтран ухаалаг утасны SmartUb аппликейшнээр санал асуулга авч эхэлсэн. Энэ жилээс ОНХС аппликейшнээр орон даяар цахимаар саналаар авч эхэлсэн бөгөөд аппликейшнийг Сангийн яамнаас хэрэгжүүлдэг "Тогтвортой амьжиргаа 3" төслөөс хөгжүүлсэн. 

Иргэд аппликейшнийг ашиглан саналаа өгөхөөс гадна ОНХС-ийн цаг үеийн мэдээ, өөрийн аймаг нийслэл, сум дүүрэгтээ хуваарилагдсан ОНХС-ийн төсөв, бусад иргэдийн гаргасан санал, Иргэд нийтийн хурал болон Иргэдийн төлөөлөгчдийн хурлын тогтоолоор баталсан жагсаалт, тендер шалгаруулалт, ажлын явц, санхүүжих хуваарь, хөрөнгө оруулалтын өмнөх, явцын болон дараах гэрэл зургууд, хууль эрх зүйн мэдээлэл зэргийг харах боломжтой. Түүнчлэн иргэнийг харьяаллын дагуу, давхардалгүй саналыг нь авах, төрийн үйлчилгээг нэг дороос хялбар, чирэгдэлгүй үзүүлэх боломжийг бүрдүүлэх, Засгийн газрын системүүд хоорондын уялдаа холбоог хангах зорилгоор ОНХС-ийн Удирдлагын мэдээллийн системийг E-Mongolia систем болон нэвтрэлтийн ДАН системтэй холбосон.

2023 оны ОНХС-аар хэрэгжүүлэх төсөл арга хэмжээнд 2022 оны зургаадугаар сарын 1-ий өдрийг хүртэл саналаа өгөх боломжтой. ОНХС аппликейшнээс гадна E-Mongolia аппликейшн, цахим хуудсаар саналаа өгөх боломжтой" гэв.