Дуурь бүжгийн эрдмийн театрыг нураахаар болсон гэх мэдээлэл цахим сүлжээнд түгээд буй юм. 70 жилийн түүхтэй тус барилгыг буулгах нь хэмээн иргэд бухимдаж байгаагаа өөрсдийн цахим хуудсанд илэрхийлсэн. Харин энэ талаар Соёлын сайд Ч.Номин өөрийн цахим хуудсандаа ийнхүү нийтэлжээ. Тэрбээр,

"Дуурь бүжгийн эрдмийн театрын барилгын их засварын ажил үргэлжилж байна.

Энэ барилга бол манай нэрт архитектурчид, уран барималчид, ахмад уран бүтээлчдийн театрын барилгын сонгодог жишээ болсон барилга. Одоогоор гадна багана, ханын будгийг бүрэн хуссан тул хуучирч муудсан төрх нь харагдаж байгаа юм. Мөн архитектурын чимэглэлүүдийг гэмтээхгүйгээр баримал ба чимэглэлийн хэсгүүдийг нөхөн сэргээж байна.

Азийн ягаан театр гэж нэрлэгдсэн алдарт театрын барилгын өнгийг өөрчлөхгүйгээр, их засварыг дуусгаж, уран бүтээлчид маань урлагт хайртай та бүхэнтэйгээ дуурийн тайзнаа удахгүй учран золгоно оо" гэжээ.

Энэхүү барилгыг 1946-1949 онд барьж, 1950 оны 12-р сарын 30-ны өдөр Б.Дамдинсүрэн, Б.Смирнов нарын хөгжим, Д.Нацагдоржийн цомнол “Учиртай гурван толгой” дууриар хөшгөө нээснээс хойш үйл ажиллагааны чиглэлийг нь өөрчлөлгүй ашиглаж ирсэн юм.

Мөн Монгол Улсын дуурь бүжгийн эрдмийн театрын барилга нь театрын барилгын сонгодог жишээ бөгөөд дотор гадна чиглэлийн ажлыг 1950 онд архитектор Б.Чимэд болон түүгээр ахлуулсан монголын ахмад уран бүтээлчид буюу Төрийн хошой шагналт, Ардын зураач, XX зууны манлай зураач О.Цэвэгжав, Урлагийн гавьяат зүтгэлтэн, Төрийн шагналт зураач Д.Чойдог, Төрийн шагналт зураач Д.Манибазар, Төрийн шагналт, Ардын зураач Ү.Ядамсүрэн, Урлагийн гавьяат зүтгэлтэн, уран барималч С.Чоймбол ахмад, Төрийн шагналт, Ардын зураач, Урлагийн гавьяат зүтгэлтэн Н.Жамбаа, Урлагийн гавьяат зүтгэлтэн А.Даваацэрэн, уран барималч А.Доржготов нар бүтээжээ.