Улсын Их Хурлаас “Төсөв-2023” олон нийтийн нээлттэй хэлэлцүүлэг зохион байгуулж байна. Энэ үеэр Сангийн сайд Б.Жавхлан мэдээлэл танилцууллаа.
Тэрбээр "Монгол банкны хамт олонтойгоо хамт Намрын ээлжит уулзалтад оролцоод өчигдөр буулаа. Тухайн уулзалтад юу болов, юу яригдав гэдэг талаар мэдээлэл өгье.
Жилийн өмнө буюу 2022 оны төсвийг хийж байхад эдийн засгийн хүлээлт өөр байжээ. 2022 оныг цар тахлын дараах өсөлтийг хангана гэсэн эерэг хүлээлттэйгээр харж байсан. Өнөөдөр энэ хүлээлт нэгэнт өөрчлөгдсөн. Бидний тооцоолж байгаагүй дайн тулаан буюу ковидын дараах угсаа залгаа байдал нь нийгэм эдийн засгийн сорилтод орсон. Нийт өсөлт чиг хандлагад бидний төсөөлж байгаагүй зүйл рүү орлоо гэдгийг хүлээн зөвшөөрлөө. Бид 2022 оны төсвөөр ковидын дараах нийгэм эдийн засгийг дэмжих ийм төсөв хэмээн харж байсан.
Энэ жил эхний хагас жилдээ амжиж хоёр ч удаа тодотгол хийсэн. Тодорхой хэлбэл хэмнэлтийн бодлого. Мөнгөний бодлого хатууруулах бодлого руугаа орсон. Инфляц тодорхой хэмжээнд өсөлт нь саарлаа. Мөн төсвийн орлого бүрдүүлэлт 98 хувьтай явж байна.
Үүний үр дүнд хэмнэлт хийсний дараах төсвийн урсгал зардал болон нийт төсвийн өртгийг санхүүжүүлж, засгийн газрын үйл ажиллагаанд ямар нэг доголдол үүсэхгүйгээр төсвийн нөхцөл байдал үүслээ хэмээн харж байна. Ийм ерөнхий нөхцөл байдлын хүрээнд 2023 оны төсвийг өргөн барьсан байгаа. Дэлхий нийтэд дэлхийн даяарчлалаас сугарч үлдсэн нэг ч улс байхгүй. Бие биеэсээ бүгд хамааралтай эдийн засгийн интегралд нэгэнт оржээ. Тиймээс ерөнхий макро төлөв байдал, эдийн засгийн эрсдэлийг буруулах бодлогын арга хэмжээнүүд ижил төстэй байна. Мөн өөр өөрийн улс орны эдийн засгийн нөөц боломжоос шалтгаалсан онцлогуудыг шингээсэн байдлаар явъя гэдэгтэй дэлхий нийтээрээ санал нийлж байна. Төсвийн хумих бодлого үргэлжилнэ” гэв.
Д.Батчулуун
