Монголын Авто сургалтын байгууллагуудын нэгдсэн холбооны төлөөллүүд мэдээлэл хийлээ. Энэ үеэр тус холбооны Удирдах зөвлөлийн дарга В.Болдмөнх мэдээлэл өглөө.
Тэрбээр “Жолооны сургалтын чанар муу биш. Энэ бол зөвхөн сургалтын үйл ажиллагаа эрхэлдэг газар. Харин жолооны эрхийг Цагдаагийн байгууллага олгодог. Сургалтын үйл ажиллагааны зөвшөөрлийг ХНХЯ өгдөг. Сургалтын чанар муу гэх асуудлыг юм болгонд ярих нь өрөөсгөл. Замын хөдөлгөөний дүрмийн мэдлэгийг сургуулийн өмнөх бага, дунд, ахлах ангид системтэйгээр олгох шаардлагатай. Ингэж байж замын хөдөлгөөнд оролцох зөв чиг хандлага, дадал үүснэ. Дэлхийн дийлэнх улс оронд замын хөдөлгөөний дүрмийг хүүхдүүдэд үе шаттайгаар зааж өгдөг.
Гэтэл манай улсад жолооч болох шаардлагатай болсон үедээ л сургалтад суудаг. Жолооч болоогүй хүн зохицуулагчийн дохиог мэддэггүй. Зохицуулагч байгаа тохиолдолд гэрлэн дохио хамаарахгүй, зохицуулагчийн дохиог дагадгийг ч мэдэхгүй байна.
Замын хөдөлгөөний дүрмийн сургалтыг явуулах, ЕБС-д хөтөлбөр оруулах саналыг Төрийн байгууллагуудад тавьсан. Манай холбоод замын хөдөлгөөний дүрмийг заах боловсон хүчин улсын хэмжээнд нийтдээ 600 гаруй байна. Энэ нь ЕБС-ийн сурагчдад мэдлэг олгох хангалттай нөөц бололцоо юм” гэв.
