Хөдөө орон нутгийн шатахуун түгээх станцууд дизель түлшний хомсдолд оржээ. Энэ талаар УИХ-ын гишүүн Н.Ганибал өнгөрсөн пүрэв гарагийн чуулганы нэгдсэн хуралдааны үеэр хэлсэн. Үүнтэй холбогдуулан Ашигт малтмал, газрын тосны газраас дараах мэдээллийг тодрууллаа.

Өнгөрсөн баасан гарагийн байдлаар, Монгол Улсын хэмжээнд дизель түлш 11 хоногийн нөөцтэй байсан бол амралтын өдрүүдэд дизель түлшний татан авалт хийгджээ.   

Газрын тосны хангамжийн асуудал хариуцсан ахлах мэргэжилтэн Д.Дагвасүрэн

Дизель түлшний татан авалт гадаад нийлүүлэгчээс шалтгаалсан, төмөр замын удаашралтай нөхцөлд байна. Одоогийн байдлаар манай улс ОХУ-ын гурван үйлдвэрээс түлшний ачилт хийсэн. Хамгийн ойрын буюу Ангарск хотоос хийсэн тогтмол татан авалтууд Монгол Улс руу ирж байна. Харин бусад хоёр үйлдвэрийн хувьд хол зайтай учир төмөр замаар тээвэрлэх явцад удаашралтай байгаа юм. Ачилт хийсэн галт тэрэг хаана яваа болон тээвэрлэлтийг хэвийн горимоор үргэлжлүүлэхийн тулд хоёр улсын талууд хамтран ажиллаж байна.

Дизель түлшний үнэ нэмэгдээгүй. Өнгөрсөн баасан гарагт орон нутаг дахь төлөөлөгч нараар дамжуулж түлшний үнийн тандалт хийсэн. Ингэхэд дизель түлшний үнэд өөрчлөлт ороогүй байна” гэв.

Т.Мөнхжаргал