Хууль зүйн дэд сайд Э.Эрдэнэжамъяанг АТГ-аас гэрчийн мэдүүлэг авч байна гэж мэдээллэсэн билээ. Энэ талаар УИХ-ын гишүүн О.Баасанхүүгээс тодрууллаа. Учир нь тэрбээр дэд сайд Э.Эрдэнэжамъяантай уулзахаар цаг товлосон ч ирээгүй учир өрөөнд нь ороход ийм асуудал үүссэн байсан юм.
-Дэд сайдын өрөөнд юу болж байна вэ?
-АТГ-ын Мөрдөн байцаах хэлтсийн дарга Наранбаатар дэд сайд Э.Эрдэнэжамъяангаас гэрчийн мэдүүлэг авч байна. Уг нь дэд сайд Э.Эрдэнэжамъяан бид хоёр уулзахаар 14.00 цагт цаг товлосон байсан юм. Гэтэл ирээгүй. Иймд би сайдын ажлын өрөөнд ортол ийм зүйл болж байна.
-Яагаад сайдын өрөөнд гэрчийн мэдүүлэг авч байгаа юм бэ?
-Уг нь мөрдөн байцаах хуулиндаа мөрдөн байцаалтыг авна гэж заасан байдаг. Гэтэл энэ дарга даварч ажлын өрөөнд нь авч байна. Энэ талаар өөрөөс асуухаар “Хууль зүйн сайд Х.Тэмүүжин зөвшөөрсөн учир авч байгаа юм” гэсэн хариултыг өгч байна. Уг нь энэ зөвшөөрлийг Х.Тэмүүжин сайд өгөх ёсгүй. Зөвхөн өөрөөс нь авах ёстой. Мөн дэд сайд Э.Эрдэнэжамъяанд гэрчийн мэдүүлэг авах талаар амаар болон албан бичиг өгөөгүй байна. Ийм хууль зөрчсөн мэдүүлэг авч байна.