Хорвоогийн гурван их буяны нэг нь хүүхэд төрүүлж өсгөх, хоёр дахь нь ном бүтээх, гурав дахь нь байгаль дэлхийгээ хайрлаж мод тарих явдал билээ. Гэтэл зовж зовж төрүүлсэн үрээ хэн нэгний буруугаас  эсвэл өөрсдийн хайхрамжгүйгээс болоод  алдана гэдэг үнэхээр харамсалтай.

Манай улсын нийт хүн амын 36 хувь буюу гуравны нэгээс илүү хувийг  18 хүртэлх насны хүүхэд эзэлдэг. Гэтэл сүүлийн саруудад л гэхэд бүр цаашлаад он гарсаар амиа алдсан хүүхдийн тоо эрс өссөнийг  та бүхэн мэдэж байгаа байх.

“Бага насны охид, хөвгүүд газ үнэрлэж байна” , “Зам тээврийн осолд орлоо”,  “Барилга дээрээс төмөр унаж хүүхэд амь насаараа хохирлоо”,  “Хүүхэд хүчиндүүлж байна”, хүүхэд түлэгдэж нас барлаа. Тиймээ иймэрхүү мэдээлэл хаа сайгүй гарах болсон. Бүр ойр ойрхон шүү.  “Эхэндээ бид энэ мэдээллүүдээс айж цочирддог байсан бол сүүлдээ тоохоо  ч больчихож. Өдөр болгон болоод гарч байдаг жирийн үзэгдэл шиг боддог болсон ч байж болох.

Хамгийн гол нь хүүхэд гадны  нөлөөллөөс болж эндэх нь их байгаа ч сүүлийн үед эцэг эхийн хайхрамжгүй байдлаас улбаалан  гэр ахуйн нөхцөлд, найз нөхдийн хүрээнд  эндэж бэртэх нь их болжээ.   Хүүхдийн эндлийн үй олон шалтгаан байгаа. Бага насны хүүхдээ гэртээ үлдээх, хараа хяналтгүй орхисноос амийг нь хохироосон, газ үнэрлэсэн, халуун цай хоолонд түлэгдсэн гэх хэргүүд сүүлийн үед дэндүү гэмээр олон гарсан ч зүрх зүсэм муу мэдээг нэгбүрчлэн тоочихоо азная. Зөвхөн хамгийн сүүлд гарсан аймшигт түймрийг л жишээ болгон дурдъя. Гэмтэл согог судлалын үндэсний төвийн харьяа эмнэлэг болох Түлэнхийн төвд хэвтэн эмчлүүлэгчдийн 80 хувь нь бага насны хүүхдүүд байдаг. Ажилдаа гарахдаа хүүхдийнхээ томоор багыг нь харуулах, өндөр настай эмээ, өвөөтэй нь орхих зэрэг нь Монголд л дэлгэрсэн хэвийн үзэгдэл. Ингэж толгой мэдэн үлдсэн хүүхдүүд халуун цай, хоолондоо түлэгдэх, унаж осолдох нь их.

Он гарсаар нийслэлийн нутаг дэвсгэрт 885 удаагийн объектийн гал түймэр гарч үүнээс дийлэнх буюу 258 амины орон сууц, 185 ил задгай болон дулааны сувагт хуримтлагдсан хог шатсан дуудлага эзэлж байна. Мөн эзэнгүй хашаа болон айлын хашаанд, нийтийн эзэмшлийн талбайд зэрлэг өвс шатсан 22 тохиолдол гарчээ. Хамгийн гол нь 2-5 настай хүүхдүүд түлэнхийн төвд дугаарлаж, орь дуу тасарталаа шаналж, тарчилж байна.
Тиймээс юу ч мэдэхгүй гэнэн томоогүй үрс 150 ортой эмнэлгээр үйлчлүүлэгчдийн дийлэнх хувийг бүрдүүлж байна. Түлэгдлийн хүндрэлээр нас барж буй хүмүүсийн 70 хувь нь 0-5 насны хүүхдүүд гээд сонсоход сэтгэл сэрдхиймээр.

    Хамгийн сүүлд л гэхэд
Өнгөрсөн бямба гаригийн  үүрээр нийслэлийн Чингэлтэй дүүргийн XII хорооны нутаг дэвсгэрт гал гарч ээж, охин хоёр амиа алдан, бага насны хүүхэд түлэгдэж хүнд гэмтсэн. 27 настай эмэгтэй Ж, таван настай охиныхоо хамт гал түймэрт өртөж нас барсан. Үнэхээр харамсалтай, эмгэнэлтэй. Харин  хоёрхон ойтой эрэгтэй Б.Энхбилэгийн гар, нүүрний хэсэг түлэгдсэн байсныг олж эмнэлгийн анхан шатны тусламж үзүүлэн Түлэнхийн  төвд хүргэсэн.
Бяцхан хүүгийн нүүр болоод баруун гар нь түлэгдсэн. "Түүний сурсан үг бол ээж ээ, аав аа". Хүү одоо түлэнхийн төвд хорвоог орхисон ээжийгээ, хямралд орсон аавыгаа дуудан шаналж байгаа. Ямар их зовиуртай, яаж зовж байгаа бол гэж бодохоор үнэхээр сэтгэл эмзэглэмээр.  Хажууд нь үргэлж байдаг ээж, эгч нь ч байхгүй шүү дээ.

    Хэдхэн сартай хүүхдүүд түлэгдэж нас барж байна
Баянзүрх дүүргийн аравдугаар хороонд арван сартай хүүхэд амиа алдсан. Тэрээр халуун хоолонд түлэгдэн, ГССҮТ-д хэвтэн эмчлүүлж байсан ч гэмтлээ даалгүй нас барсан байна. Мөн үүнээс хоёр хоногийн өмнө долоон настай хүүхэд тогоотой тосонд түлэгдэж гэмтсэн хэрэг гарсан юм. Энэ мэт бага насны хэдхэн сартай хүүхдүүд түлэгдэлтийн шархыг даахгүй нас барсаар байна.

Ирээдүйн Монголыг бүтээх бяцхан үрс маань ийм эрсдэлтэй цаг үед өсөж байна. Түлэнхийн төвийн ийм бараан төрх бол Монголын нийгмийн маш том асуудал. Энэ нь ядуурал, хүүхдээ оруулах цэцэрлэг хүрэлцээгүй, ясли байхгүйтэй ч шууд холбогдоно. Бяцхан үрсдээ цаг ямагт анхаарлаа хандуулахаа мартуузай хүмүүс ээ!