Монгол хүү дэлхийн нэр хүндтэй дуурийн дуулаачдын уралдаанд сүпер амжилт гаргаж байсан цаг саяхан. Оросын нэрт хөгжмийн зохиолч М.И.Глин­кийн нэрэмжит олон улсын дуурийн дуулаачдын тэмцээний тэргүүн байрын шагналт, Цагдаагийн “Сүлд” чуулгын гоцлол дуучин, Гавьяат жүжигчин Г.Ариунбаатар удахгүй "Монгол сонгодог" тоглолтоо хийх гэж байна. Төрийн шагналт Н.Жанцанноровтой хамтран тоглож буй уг тоглолт маш олон зүйлийн онцлогтой.  Гэхдээ ганцхан удаагийн тоглолт бус. Тэрээр Монголын сонгодог бүтээлийг цувралаар тайзнаа амилуулахаар төсөл эхлүүлжээ. Төслийн нээлт болгож, Монголын нэрт хөгжмийн зохиолч, Төрийн хошой шагналт, Ардын жүжигчин Н.Жанцанноровын сонгодог бүтээлүүдээр “Монгол сонгодог” цуврал-I талархлын тоглолтоо энэ сарын 30-нд Тусгаар тогтнолын ордонд хийх гэж байна. “Монгол сонгодог” төслийн зорилго нь дэлхийн энтэй Монголын сонгодог уран бүтээлчдийн сор болсон бүтээлүүдийг нийтэд сурталчлан таниулах, гайхалтай дэлхийн хэмжээний бүтээлүүдийг монголчуудад үзүүлж мэдрүүлэхэд оршиж буй юм.

“Монгол сонгодог”-ийг Ц.Намсрайжавын нэрэмжит Улсын филармонийн симфони найрал хөгжим, Морин хуурын чуулгын хөгжимчид бүрэн бүрэлдхүүнээрээ оролцон тоглох ба Монголын сонгодог урлагийн төлөөлөл болсон уран бүтээлчид болох УДБЭТ-ын гоцлол дуучин, Ардын жүжигчин А.Долгор, “Voice group”-ийн дуучин, Соёлын тэргүүний ажилтан Д.Отгонжаргал, УДБЭТ-ын гоцлол дуучин, Соёлын тэгргүүний ажилтан Ө.Уянга, нар оролцох аж.