Өнөөдөр Хууль зүйн байнгын хороо нэгэн сонирхолтой асуудлыг хэлэлцэв. АТГ-аас Ашиг сонирхлын зөрчлөөс урьдчилан сэргийлэх хуулийн тухай зөвлөгөө авахаар УИХ-ын дарга З.Энхболдод ханджээ. Уг нь хуулийн дагуу УИХ-ын дарга зөвлөмж өгдөггүй бөгөөд АТГ-ыхан Хууль зүйн байнгын хороонд саналаа гаргаж, тус байнгын хорооны гишүүд хууль санаачилж болох аж. Гэтэл АТГ-ын дэд дарга Б.Хурц энэ хуулийн зарим заалтыг хэрхэн хэрэгжүүлэх тухай УИХ-ын даргаас зөвлөгөө хүсчээ. УИХ-ын гишүүн Б.Цог "Уг нь УИХ-ын даргад сайд, дарга нар ханддаг. Гэтэл дэд дарга нь ханддаг нь ямар учиртай вэ?" гэж асуув.
Х.Тэмүүжин нарын санаачилсан Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийг хэрэгжүүлэхэд олон эргэлзээтэй, тодорхойгүй заалтууд байгаа аж. АТГ-ын зарим ажилтнууд ч хуулийг буруу тайлбарлаж иргэдийг айлгаж байгааг Х.Тэмүүжин сайд хэллээ. Гэр бүл, садан төрлөөс бусад хүний өгсөн үнэтэй бэлгийн авлигал гэж үзэх тухай заалтыг буруу тайлбарлаж эхнэр нь нөхөртөө бэлэг өгвөл хахууль болно гэсэн утгаар ойлгуулсан явдал ч гарчээ.
Үүнээс гадна төрийн өмчийн байранд засгийн эрх хэрэгжүүлэгч байгууллагатай хамт байх нь өөрөө ашиг сонирхлыг зөрчилтэй байгаа аж. Х.Тэмүүжин сайд "Нэг аймгийн Мэргэжлийн хяналтын байгууллага нь зайрмагын цехтэй хамт байвал бусад нь "бид нарыг шалгаж, хянаад байдаг. Яг хаяанд чинь хамгийн муу зайрмагны цех байна" гэх зэргээр шүүмжилж төрийн байгууллагад итгэх итгэл суларч байна. Ядаж л төрийн албан хаагч, хувийн байгууллагын ажилтны гардаг, ордог хаалга нь тусдаа байх ёстой" гэв. УИХ-ын дарга З.Энхболд ч "Би зөвлөгөө өгдөг хүн биш" гээд гарч одов.
Тиймээс АТГ-ынханд дэрх хуулийн зарим заалтыг тодруулахад нь туслахаар Хууль зүйн байнгын хорооноос ажлын хэсэг гаргахаар боллоо. Ажлын хэсгийн даргаар О.Баасанхүүг томилсон бөгөөд Орон нутгийн сонгуулийн дараа АТГ-ын ажилтнуудад зөв ойлголт өгөх семинарыг тус байнгын хорооноос зохион байгуулахаар болов.
24tsag.mn
Сэтгэгдэл (3)