Гоо сайхныг зөвхөн бүсгүй хүнээр төсөөлдөг байдал хоцрогдож, эрчүүд ч гоо сайхны төлөө тэмцэж байна. Дэлхийд чансаагаараа гуравт ордог эрэгтэй загвар өмсөгчдийн "Manhunt International 2012" тэмцээн Тайландын Бангкок хотод болж байгаа юм. Сонирхолтой нь монгол загвар өмсөгч залуу Буянхишигийн Билгүйтэй энэ тэмцээнд амжилттай оролцож, санал асуулгаар эхний 10 байрт орж байна. Тэрбээр Тайландын "Фон" загварын агентлагт 2010 оноос загвар өмсч эхэлжээ. Х.Билгүйтэй нь "САС" дотуур хувцасны брэндийн нүүр царай болж, хэдэн хэдэн сэтгүүлийн нүүр хуудсанд гарч байсан. Тэрбээр усан спортоор хичээллэдэг бөгөөд 2006 онд Катарт болсон Азийн спортын их наадамд, 2007 онд Усан спортын ДАШТ-д Монгол улсыг төлөөлөн оролцож байсан юм.

  "Manhunt International 2012" тэмцээнд монголчууд гурван жил дараалан оролцож байгаа бөгөөд 2010 онд Г.Дөлгөөн-Аюуш, 2011 онд жүжигчин, загвар өмсөгч О.Амгаланбаатар оролцож шилдэг 15-т шалгарч байжээ. Тэмцээнд 53 орны залуус оролцож байна. Харин тэмцээний шаардлага нь 182 см-ээс дээш өндөртэй, өмнө нь загвар өмсөгчөөр ажиллаж байсан туршлагатай байх. Мөн биеийн хэлбэр, фото төрх, хувийн зохион байгуулалттай байх нь тэмцээний гол шалгуур аж.

   Тэмцээний эцсийн шалгаруулалт 11-р сарын 9 буюу ирэх баасан гарагт болох бөгөөд Монголын оролцогчоо дэмжиж "UBS" телевизийн сэтгүүлчид мэдээлэл дамжуулж байгаа. Ялагч нь 10 мянган ам.доллар, олон улсын нэр хүнд бүхий агентлагуудад гэрээгээр загвар өмсөгчөөр ажиллах эрх, 25 мянган ам.долларын үнэ бүхий гоо сайхны үйлчилгээний эрх, таван мянган ам.долларын фото зургийн альбом хийлгэх эрх болон 40 мянган ам.доллартай тэнцэх хэмжээний бусад шагналыг авах юм. Харин финалын шатанд оролцох 15 загвар өмсөгчийн нэгийг олон нийтийн санал асуулгаар тодруулна. Монгол залуугаа дэмжиж www.manhunt.com.sg хаягаар орж саналаа өгөөрэй.

Монголын оролцогч Х.Билгүйтэй: