Ц.Шаравдоржийг УИХ-ын Тамгын газрын даргаас чөлөөлсний дараа түүний оронд Б.Болдбаатарыг томилох асуудлыг хэлэлцэв. Түүнийг туршлага багатай гэж МАН-ын зарим гишүүд шүүмжилж байсан бол АН-ынхан залуу, эрч хүчтэй хүн гэж дэмжив.

    Д.Лүндээжанцан "Энэ албан тушаалд нам бус байна гэж хуулиндаа зааж өгсөн байдаг юм. Цэвэр гал зуухны, тогтвортой байх ажил гэж үздэг. УИХ-ын Тамгын газраас хууль тогтоох үйл ажиллагаа шалтгаалдаг. Тиймээс энэ ажил дээр очсон хүн бол нам бус, жинхэнэ төрийн хар хүн л байх ёстой. Намын харьяаллаар ажиллах хүн байдаггүй юм" гэв.

    УИХ-ын гишүүн С.Эрдэнэ "Туршлагатай толгой хуульчид гэж яриад байх юм. Үнэнийг хэлэхэд тэр туршлагатай хүмүүс чинь төрийн толгойд сандаалаад суучихсан байна шүү" гэв. Мөн Б.Болдбаатарт хандаж "Төрийн ордны зарим зохион байгуулалтад анхаарах зүйл бий. Ганцхан женсэн өмдтэй хүн байвал ийшээ орохдоо өмдөө тайлаад орох юм уу? Гэхдээ замбараагүй болго гээгүй, иргэнийхээ төлөө юм хийгээрэй гэж хүсч байна.  Бас Төрийн ордонд арын хаалганы дөрөвхөн телевизийн суваг гарч байна. цаашид телевизийн сувгийн тоог нэмэх зэрэг ажил байгаа" гэж захив. 

Ж.Батзандан гишүүн "Сүүлийн үед манай хуулийн чанар муудаад байгаа. Сэтгэлийн хөөрлөөр орж ирж буй олон төсөл бий. УИХ-ын Тамгын газрынхан өглөө нь нэг юм тараагаад тавьчихсан байдаг.  7 хоног биш юм гэхэд гурав хоногийн өмнө гишүүдэд тараах хэрэгтэй байна. Нэг хуулийн төслийг бэлтгэхэд 5-10 эрдэмтний судалгааг харьцуулдаг байх хэрэгтэй. Мөн хууль сурталчилах ажил хангалтгүй байгаа. Ордон руу иргэд орж ирэхэд маш их хүнд суртал байна. Үүнийг шинэ дарга шинэ түвшинд шийдээрэй" гэлээ.

Ч.Сайханбилэг гишүүн "Дөрвөн жил хамтарч ажилласан болохоор би энэ хүнийг сайн мэднэ. Энд байгаа зарим гишүүдээс илүү гарна уу гэхээс муудахгүй. УИХ-ын хуулийн төслийг гардаж, бичдэг чадвартай хүн. Зарим хүн Тамгын газрын дарга толгой илүү хуульч байх ёстой гэж байна. Топ, толгой хуульчийн асуудал байхгүй сайн хуульчийн тухай л ярьдаг. Б.Болдбаатарыг толгой хуульч юм уу гэж асуугаад байх шаардлагагүй. Тамирчид шиг хуульчдийг эрэмбэлэх шаардлага байхгүй"гэв.

    УИХ-ын Тамгын Газрын даргаар томилогдсон Б.Болдбаатар нь 1968 онд төрсөн. 1992 онд Москвагийн авто замын дээд сургууль, 2001 онд МУИС-ийн Хууль зүйн сургуулийг төгссөн. Инженер, хууль мэргэжилтэй. 2004 оноос УИХ-ын тамгын газар, намын бүлэгт ажиллаж ирсэн. УИХ дахь Эх орон- ардчилал эвслийн бүлгийн ажлын албаны дэд дарга, УИХ дахь олонхийн бүлгийн ажлын албаны дэд дарга, УИХ дахь АН-ын зөвлөлийн болон АН-ын бүлгийн ажлын албанд ажиллаж байсан аж.
  
  Тэрбээр өнөөдрөөс УИХ-ын Тамгын газрын даргаар ажиллахаар болж байна.