Энэ жил анх удаа албан ёсоор сүлд модны гэрэл асаах ёслолыг зохион байгуулж хотын дарга нийслэлийн хүүхэд багачуудтайгаа сүлд модны гэрлээ асааж тэдэнд бэлэг гардуулсан. Арванхоёрдугаар сарын 31-нд Сүхбаатарын талбайд 23.00 цагт хотын дарга иргэдтэйгээ хамт шинэ оноо угтахаар болжээ. Ингэхдээ урлагийн тоглолт, өвлийн өвгөн, цасан охид гээд урьд урьдынхаас илүү шинэлэг зохион байгуулахаар бэлтгэл ажлаа хийж байгаа тухай ажлын хэсгийнхэн мэдээлж байна. Гадаа хүйтэн байгаа учир иргэдийн аюулгүй байдлыг хангах үүднээс гадаа зохион байгуулах арга хэмжээ цаг гаруй үргэлжлэх аж. Мөн арванхоёрдугаар сарын 24-нд Монголын Хүүхдийн ордонд амьдралын баталгаажих түвшингээс доогуур орлоготой, хөгжлийн бэрхшээлтэй, амьдралын хүнд нөхцөлд ажиллаж, амьдарч байгаа 1000 хүүхдийн шинэ жилийн баярыг зохион байгуулна. Энэхүү баяр нь шилдэг хүүхдүүдийн төлөөлөл оролцдог “Харшийн сүлд модны наадам”-ын хөтөлбөрөөр явагдах юм байна.
Жил жилийн баяраар гэр хорооллынхон орхигддог. Өмнөх жилүүдэд ёслолын буудлага, сүлд модоо хотын төвдөө байрлуулчихсан бол хотын дарга энэ байдлыг өөрчилж гэр хорооллынхны дунд буюу дүүрэг бүрт сүлд мод засаж, шинэ жилийн баяр зохион байгуулах үүргийг дүүргийн Засаг дарга нарт өгсөн. Өнгөрсөн амралтын өдрөөр сүлд модны гэрэл асаах ёслол дүүрэг бүрийн сүлд модны гэрэл асаах ёслолтой зэрэг болсон.

Нийслэлийн иргэдийн шинэ жилийн баярыг зохион байгуулах бэлтгэл ажил бэлтгэл ажлаа хангаад явж байгаа юм байна. Мөн шинэ оноо угтах тэр мөчид техникийн бүрэн бүтэн байдлыг хангах, цахилгааны эх үүсвэрийг бэлтгэх, эмнэлгийн үйлчилгээний автомашин байрлуулах, цагдаагийн хамгаалалт гаргаж, хэв журмыг сахиулах зэрэг ажлуудыг зохион байгуулахаар ажиллаж байгаа аж.