УИХ-ын гишүүн Д.Арвин МАН-аас гарах өргөдлөө өгсөн нь улс төрийн хүрээнд олон хүний сонирхлыг татаж байна. МАН-аас арван хоёр жил парламентад сууж, энэ жил дахин сонгогдсон хэрнээ намаасаа гарч байгаагийн шалтгааныг тэрбээр маргааш хэлнэ гэж мэдэгдээд байгаа. Тэгвэл “Бор зүрхээрээ намдаа зүтгэсэн” гэх Д.Арвиныг ийм эрсдэлтэй алхам хийхэд юу хүргэв гэдэгт намынхан нь дүгнэлт хийж эхэлжээ. Д.Арвин Хэнтий аймгаас гурван удаа УИХ-д сонгогдсон. Харин энэ жил нийслэлийн Баянзүрх дүүрэгт нэр дэвшиж, энд л олон жил ужгирсаар байсан зөрчил нь дээд цэгтэй тулсан бололтой. Тэрбээр М.Энхболдын тэргүүлдэг хотын бүлэглэлийнхэнтэй таарахгүй байсан тул ийм алхам хийсэн аж. Д.Арвинг Сү.Батболдын Засгийн газрын үед Т.Гандигийн оронд Нийгмийн хамгаалал, хөдөлмөрийн яамны сайд болгоно гэж намын удирдлагууд нь амлаж байсан ч хэлсэндээ хүрээгүй. Т.Ганди элчин сайдаар томилогдож, суудал нь түр хоосрох байсан ч тэрбээр элчин сайдаар явахаа сунжруулсаар сайдын хугацаагаа дуусгачихсан. Тиймээс Д.Арвинд сайд байж үзэх боломж олдоогүй аж. Дараахан нь 2012 оны сонгуулиар Хэнтийн тойргоо ч бас алдсан. Харин юу юунаас илүү Баянзүрх дүүрэгт нэр дэвшихэд намынхан нь түүнийг биш тус дүүргийн засаг дарга асан Д.Батзоригийг дэмжсэн нь Д.Арвиныг өөр сонголт хийхэд хүргэсэн байна. Түүнийг намаасаа гарах хэрэггүй гэж намын дарга Н.Энхтүвшин, “бүлгийн” дарга Н.Энхболд, дэд дарга С.Бямбацогт, ерөнхий сайд асан С.Батболд гишүүн гээд удирдлагууд нь ятгаж байгаа аж. Гэхдээ л Д.Арвин намаасаа гарахаар шийдэж, өргөдлөө өгсөн нь нэгэнт тодорхой болсон билээ.
Харин сонирхолтой нь түүний өргөдлийг хэвлэлийнхэнд тараахад мөн л М.Энхболдын тэргүүлдэг, хуучин МАН-ын засаг дарга нар багтдаг хотын бүлэглэлийнхэн гол үүрэг гүйцэтгэжээ. Баянзүрх дүүргийн намын дарга, Д.Арвинтай орон нутгийн сонгуульд өрсөлдөөд ялагдсан Д.Батзориг, нийслэлийн МАН-ын хорооны дарга Сундуй хоёр яаран сандран өргөдлийг нь хэвлэлээр цацсан гэж хардагдаж байгаа аж. Ингэж хардах нь ч бас үндэстэй юм. Д.Арвины өргөдлийг авсан намын үүр нь намынхаа журмаар дарга нартаа мэдэгдэх ёстой. Дарга нар нь мэдмэгцээ өргөдлийг нь намын батлахтай нь хэвлэлээр тараасан хэрэг. Тэгээд ч анхан шатны үүрийнхэн “Бид хэвлэлийнхэнд өгөөгүй, дарга нар л үзэж байсан, утсаараа зургийг нь авч байсан” гэж ярьж байгаа сурагтай.
МАН-ынхан өнгөрсөн сонгуульд ялалт байгуулж чадаагүй гэж дарга нараа сольсон. Харин орон нутгийн сонгуульд мөн л ялагдсан М.Энхболдын тэргүүлдэг, МАН-ын хуучин дүүргийн дарга нар багдаг хотын бүлэглэл амь бөхтэй байсаар байна. Тэдэнд сонгогчид итгэл үзүүлээгүй ч МАН-ын хотын бүлэлэлийнхэн намдаа нөлөөтэй хэвээр байгаа юм. Хэрэв өөрчлөлт хийхгүй энэ чигээрээ байвал ирэх сонгуульд ч ялах найдвар бага гэж үзэх хүн цөөнгүй байна.
Т.Гэрэл
Сэтгэгдэл (40)