УИХ-ын гишүүн Д.Арвин МАН-аас гарч АН-д элсэх гэж байна гэсэн цуу яриа гадуур яригдаад байгаа. Олон талын байр суурь, таамаг дагуулсан уг мэдээлэлд албан ёсны хариултыг АН-ын ерөнхий нарийн бичгийн дарга Ц.Оюундарь өгчээ.

Тэрээр ярихдаа "Аль нэг намд элсэх, гарах нь хувь хүний чөлөөт сонголт шүү дээ. Хуучны социализмын үеийнх шиг хатуу шалгуур, элдэв шийтгэлтэй байдаг үйл явц биш. Ардчилсан намын үзэл баримтлал, үйл ажиллагааг хүлээн зөвшөөрсөн хэн ч манай намд элсэх бүрэн боломжтой. Манайх www.demparty.mn гэсэн цахим дуудсаар ч намд элсэх өргөдөл хүлээж авдаг. Энэ тухай цөөн хүний хүрээнд ярилцаж байсан.

 Би хувь хүнийхээ хувьд Д.Арвин гишүүнийг УИХ-д удаа дараа сонгогдож чадсан, өөрийнхөөрөө байж чаддаг, намынхаа дотоодын элдэв хуйвалдаанд тэр бүр хутгалдаагүй цэвэр улстөрч гэж харж, дэмжиж явдаг. Би телевизэд ажиллаж байхдаа “Эмэгтэйчүүдээ дэмжье” аяны хүрээнд түүнийг болон бусад олон эмэгтэйчүүдийг улс төрд ороход нь дэмжиж байсан. Манай намын дүрмийн 3.1.1-д зааснаар АН-ын үзэл баримтлал, мөрийн хөтөлбөр, дүрмийг сайн дураараа хүлээн зөвшөөрч байгаа Монгол Улсын 18 нас хүрсэн иргэн манай намд гишүүнээр элсэж болно. Манай намын дүрэмд “Гишүүн нь намдаа болон дарга нартаа үнэнч ажиллана” гэсэн заалт байхгүй.

 Гишүүдээ барьж тогтоох үйл ажиллагаа явуулдаг ямар ч дүрэм журам АН-д байхгүй. Ард нийтээр хэлэлцүүлж олны дэмжлэг авсан сонгуулийн мөрийн хөтөлбөр маань одоо ид хэрэгжиж эхэлж байна.

Энэхүү шинэчлэлийн алхмыг олон хүмүүс хүлээн зөвшөөрч, гар бие оролцон хийлцье гэсэн чин хүсэлтээ илэрхийлж байгаагийн нэг нь л Д.Арвин гишүүн. МАН-д байхдаа тэрээр намынхаа шинэчлэлийн тухай хатуухан үг хэлчихдэг цөөхөн гишүүдийн нэг байсныг бүгд мэдэж байгаа. Үнэхээр шинэчлэгдэхгүй, илүү сэтгэж, илүү дуугарсныгаа тал бүрээс хавчин хяхдаг хуучны коммунист арга барил нь Ардын намд үхширмэл хэвээр ноёлж байгаа учраас л Д.Арвин гишүүн байж суух аргагүй болоод ийм сонголт хийж байгаа байх. Манай намын гишүүдийн бүртгэл, шилжилт хөдөлгөөний журамд зааснаар намын гишүүнээр элсэхийг хүссэн иргэн намын аль нэг байгууллагад хүсэлт гаргана. Хүсэлтийг өөрийн биеэр болон утас, И-мэйл, факс, захидлаар гаргаж болно гэж заасан. Мөн намд шинээр элссэн гишүүн нь үнэмлэхээ өөрийн биеэр гардан авна. Хэрэв гишүүн нь гардан авах цаг хутацааны болон орон зайн боломжгүй бол хүргүүлнэ гэж заасан байгаа. Үүний дагуу л үйл явц өрнөх байх" гэжээ.