Гэр бүл, хосын харилцаа, салалт, үл ойлголцол зэрэг асуудал нийгэмд өргөнөөр хөндөгдөх болсон энэ үед орчин үеийн хосуудын харилцааны онцлог, нийтлэг алдаа, итгэлцлийг хэрхэн бий болгож, батжуулах талаар “Nexora Consulting LLC”-г үүсгэн байгуулагч, сэтгэл судлаач М.Мөнхгэрэлтэй ярилцлаа.
-Өнөөдөр хосуудад зориулсан сургалт орлоо. Орчин үеийн хосуудын харилцааны онцлог шинж юу байна?
— Орчин үеийн хосууд илүү нээлттэй болж, EQ буюу сэтгэл хөдлөлийн мэдрэмжээ зөв илэрхийлдэг болсон нь ажиглагддаг. Мөн хувийн орон зайгаа хүндэтгэх, эрхэмлэх хандлага өндөр болсон.
Түүнчлэн карьер болон хувийн харилцаагаа зэрэг авч явах, тэнцвэржүүлэхийг илүү чухалчилж байна. Ерөнхийдөө сэтгэлзүйн боловсрол өмнөх үеэс илүү өндөр түвшинд хүрчээ.
-Сүүлийн үед гэр бүл салалтын асуудал их хөндөгдөж байна. Хосуудын харилцаандаа гаргадаг нийтлэг алдаа юу байна?
— Салалтын шалтгаан хос бүрд өөр өөр байдаг. Гэхдээ нийтлэг ажиглагддаг зүйл нь үл ойлголцол. Үл ойлголцол удаан үргэлжлэхээр харилцаан дахь итгэлцлийг бууруулж, сэтгэлзүйн зай үүсгэдэг. Мөн асуудлаа тухай бүрд нь ярилцаж шийдэхгүй дотроо хуримтлуулах, мэдрэмжээ зөв илэрхийлэхгүй байх нь харилцаанд сөргөөр нөлөөлдөг.
-Хосууд итгэлцлээ хэрхэн бий болгож, батжуулах вэ?
— Итгэлцэл маш энгийн зүйлээс эхэлдэг. Цагаа барих, амлалтаа биелүүлэх, хэлсэн үгэндээ хүрэх зэрэг өдөр тутмын жижиг үйлдлүүд урт хугацааны том итгэлцлийг бий болгодог.
Итгэлцэл бол нэг удаагийн том үйлдлээр биш, өдөр тутмын тогтвортой хандлагаар бүтдэг зүйл.
БИ+ЧИ=БИД
-Хостой болохын тулд эхлээд өөрийгөө таньж мэдэх нь чухал уу?
— Мэдээж чухал. Хосын харилцаанд ч, ер нь өдөр тутмын бүх харилцаанд хүн өөрийгөө таньж мэдэх нь эрүүл харилцааны суурь болдог.
Хоёр өөр орчинд арав, хорин жил өсөж, төлөвшсөн хүмүүс гэр бүл болно гэдэг амар зүйл биш. “Би + Чи = Бид” болдог. Тиймээс тэр “Бид”-ийг зөв бүтээхийн тулд эхлээд өөрийгөө сайтар ойлгож, таньж мэдэх хэрэгтэй.
Өөрийгөө ойлгодог хүн хэрэгцээ, хил хязгаар, мэдрэмжээ зөв илэрхийлж чаддаг. Энэ нь эрүүл, тогтвортой харилцааны үндэс болдог.
-Хосууддаа хандаж юу зөвлөх вэ?
— Бие биедээ мэдрэмжээ зөвөөр илэрхийлж байгаарай гэж хэлмээр байна. Өөрт таатай болон таагүй мэдрэмжээ нээлттэй ярилцаж байх хэрэгтэй.
Асуудал гарч ирэхэд орхих, зугтах бус харин хамтдаа шийдэл хайж сурах нь чухал. Харилцаа бол хоёр хүний хамтын бүтээл учраас “би” биш “бид” гэсэн хандлагаар асуудалд хандаарай гэж зөвлөе.
Т.Зузу
