Олон нийтийн сүлжээний нөлөө бүхий хүн Эндрю Тейт болон түүний дүү Тристан Тейт нарыг АНУ-ын Флорида мужид Их Британийн эрх баригчдын хүсэлтийн дагуу баривчилжээ. Тэдний өмгөөлөгч Майкл Макбрайд ах дүү хоёр ямар ч гэм буруугүй хэмээн мэдэгдэж, Их Британи тэднийг шилжүүлэн өгөхийг хүссэнд шүүмжлэлтэй хандав. “Румын болон Их Британийн засгийн газруудын хооронд Румынд явагдаж буй хэрэг хянан шийдвэрлэх ажиллагаа дуусах хүртэл Их Британи шилжүүлэн өгөх хүсэлт гаргахгүй гэсэн олон жилийн тохиролцоо бий. Тэр ажиллагаа одоо ч үргэлжилж байна. Аль ч улс төрийн зорилгоор өөр улсын шүүхийн бүрэн эрхт байдлыг зөрчиж болохгүй учраас ийм тохиролцоо оршдог” хэмээн Макбрайд мэдэгджээ.

Тэрбээр ням гарагт “X” платформд нийтэлсэн мэдэгдэлдээ ах дүү Тейт нарыг улс төрийн үзэл бодлоос нь болж баривчилсан бөгөөд ганцаарчилсан хорих байранд саатуулж байгаа гэж бичсэн байна. Макбрайдын хэлснээр ах дүү хоёр энэ сарын эхээр Вашингтон хотод очиж, улс төрийн уулзалтууд хийжээ.

Румын улсын прокурорууд өмнө нь ах дүү Тейт нарыг Румын, Их Британи болон АНУ-ын хооронд эмэгтэйчүүдийг худалдаалж, улмаар бэлгийн мөлжлөгт оруулсан хэмээн буруутгаж байсан. Харин Тейт ах дүүс уг хэрэгт холбогдох бүх буруутгалыг удаа дараа няцаасаар ирсэн юм. Тэдний залуу хөвгүүд, эрчүүдийн дунд өсөн нэмэгдэж буй нөлөөллийн талаар олон нийтийн байгууллага, идэвхтнүүд өмнө нь анхааруулж байжээ. Эндрю Тейт нь эрэгтэйчүүдийн давамгай байдал, эмэгтэйчүүдийн захирагдах ёстой гэх үзэл болон эд баялгийг онцолсон түрэмгий өнгө аястай мэдэгдлүүдээрээ олонд танигдсан. Түүнийг өмнө нь олон нийтийн томоохон платформуудаас түдгэлзүүлж байсан юм.

Америк болон Их Британийн давхар иргэншилтэй ах дүү хоёрт өмнө нь тавьсан ял дээр нэмэгдэн олон шинэ зүйл анги үүсгэжээ. Шинэ яллах дүгнэлтүүдийг Бедфордширийн цагдаагийн байгууллагаас ирүүлсэн нотлох баримтад үндэслэн Их Британийн Хааны прокурорын алба гаргасан байна. Шинэ ял нь Английн зүүн хэсгийн Бедфордшир болон Хертфордшир мужид амьдардаг дөрвөн шинэ хохирогчийн мэдээлэлтэй холбоотой мөрдөн шалгалтын дараа нэмэгдсэн гэж цагдаагийн байгууллага мэдэгджээ.

Үүнээс гадна Эндрю Тейт Их Британид дөрвөн эмэгтэй түүнийг хүчингийн хэрэг үйлдсэн хэмээн буруутгасантай холбоотой иргэний нэхэмжлэлтэй тулгараад байна. Тейтийн хэвлэлийн төлөөлөгч өмнө нь CNN-д өгсөн мэдэгдэлдээ үйлчлүүлэгч нь “нотлогдоогүй, шалгагдаагүй эдгээр буруутгалыг эрс няцааж байгаа” гэжээ.

Дөрвөн эмэгтэйн өмгөөлөгч Мэттью Жури Тейтийг баривчилсан явдлыг сайшаасан байна. “Эдгээр шинэ ял нь миний үйлчлүүлэгчдийн гаргасан гомдолтой холбоотой эсэх, эсвэл өөр эмэгтэйчүүдийн гомдолтой холбоотой эсэхийг бид одоогоор мэдэхгүй. Гэхдээ шударга ёсыг зохих ёсоор хэрэгжүүлэхэд ахиц авчрах аливаа алхамыг сайшаах ёстой” хэмээн тэр мэдэгджээ.

Ах дүү Тейт Румынд зорчих хөдөлгөөнд нь тавьсан хязгаарлалтыг цуцалсны дараа тус улсаас гарч, 2025 оны хоёрдугаар сард Флоридад ирсэн байна. Гэвч тэднийг тус мужид ирсний дараа дахин нэг эрүүгийн мөрдөн шалгалтын төвд оржээ. Флорида мужийн Ерөнхий прокурор Жеймс Утмайер мөрдөн шалгалтыг зарлаж, уг хэргийг Мужийн хэмжээнд мөрдөн шалгах прокурорын алба удирдаж байгаа юм.

    Эндрю Тейт өмнө нь Флорида мужийн захирагч Рон Десантисыг шүүмжилж байсан бөгөөд Десантис тэднийг муждаа таатай хүлээж авахгүй гэдгээ илэрхийлж байв.

Л.Баяр