Иргэний нисэхийн агаарын навигацийн үйлчилгээний байгууллага (CANSO)-оос жил бүр зохион байгуулдаг Ази, Номхон далайн бүсийн хурал болон Олон улсын иргэний нисэхийн байгууллага (ICAO)-ийн Ази, Номхон далайн бүсийн агаарын навигацийн үйлчилгээ үзүүлэгчдийн хорооны VI хурал (AAC/6) 2026 оны 7 дугаар сарын 6–9-ний өдрүүдэд Бүгд Найрамдах Социалист Вьетнам Улсын Данан хотноо зохион байгуулагдлаа.
Энэ удаагийн хурлыг “Accelerating Regional Implementation: Unlocking Opportunities through Regional Collaboration” сэдвийн хүрээнд зохион байгуулж, Ази, Номхон далайн бүсийн агаарын навигацийн үйлчилгээний байгууллагууд, иргэний нисэхийн байгууллагууд болон салбарын түншүүд бүс нутгийн хамтын ажиллагаа, агаарын навигацийн үйлчилгээний шинэчлэл, тогтвортой хөгжил, бизнесийн тасралтгүй ажиллагаа зэрэг тэргүүлэх чиглэлээр санал солилцов.
Иргэний нисэхийн үндэсний төв AAC/6 хурлын нийт 4 ажлын хэсгээс (WS) гурван ажлын хэсэгт гишүүнээр ажилладаг ба энэ удаад хоёр ажлын баримт бичгийг амжилттай танилцууллаа. Үүнд:
- WS1 ажлын хэсэгт агаарын навигацийн системийн хөрөнгө оруулалт, худалдан авах ажиллагааны шилдэг туршлагын хүрээнд Монгол Улсад хэрэгжүүлж буй Улаанбаатар болон Сайншандын Бүсийн нислэгийн хөдөлгөөний удирдлагын төвийн төслийг танилцуулж, тэдгээрийг хэрэгжүүлэх туршлага, тулгамдаж буй асуудлууд болон
- WS3 ажлын хэсэгт агаарын навигацийн үйлчилгээний Business Continuity болон онцгой нөхцөл байдлын бэлэн байдлыг сайжруулах чиглэлээр Монгол Улсын туршлага, хэрэгжүүлж буй арга хэмжээг тусгасан ажлын баримт бичгийг тус тус танилцуулж, бүсийн гишүүн байгууллагуудтай санал солилцов.
Мөн “ИНҮТ” ТӨХХК-ийн Гүйцэтгэх захирал Э.Энхзориг CANSO-ийн Ази, Номхон далайн бүсийн гүйцэтгэх удирдлагуудын APC3 уулзалтад оролцож, бүс нутгийн хамтын ажиллагааны тэргүүлэх чиглэл, ICAO-ийн Minimum Implementation Path (MIP)-ийн хэрэгжилт болон ирэх жилийн бүсийн арга хэмжээний зохион байгуулалтын асуудлуудыг хэлэлцэв.
Хурлын үеэр Монгол Улс 2027 оны 7 дугаар сарын сүүлээр CANSO Ази, Номхон далайн бүсийн ээлжит хурлыг Улаанбаатар хотноо зохион байгуулах эрхийг албан ёсоор хүлээн авсан бөгөөд арга хэмжээний хүрээнд Монгол Улсад гишүүн орнуудын болоод Олон улсын агаарын тээвэрлэгчдийн холбоо (IATA), Олон улсын нислэгийн удирдагчдын холбоодын эвсэл (IFATCA) зэрэг олон улсын байгууллагуудын 600 гаруй төлөөлөгчид оролцох юм.
Монгол Улсад анх удаа зохион байгуулагдах CANSO Ази, Номхон далайн бүсийн хурал нь бүс нутгийн агаарын навигацийн үйлчилгээний байгууллагуудтай хамтын ажиллагааг шинэ шатанд гаргахын зэрэгцээ, Монгол Улсаас хэрэгжүүлж буй агаарын навигацийн шинэчлэлийн бодлого, томоохон төслүүдийг олон улсын түвшинд танилцуулах, салбарын тэргүүлэх байгууллагуудтай туршлага солилцох, шинэ технологи, шилдэг туршлагыг нутагшуулах, хүний нөөцийн чадавхыг бэхжүүлэхэд чухал ач холбогдолтой юм. Түүнчлэн Монгол Улсын бие даасан агаарын навигацийн үйлчилгээний байгууллагын хувьд Иргэний нисэхийн үндэсний төвийн үйл ажиллагаа, хөгжлийн зорилт, хэрэгжүүлж буй шинэчлэл, бүтээн байгуулалтын ажлуудыг олон улсын тавцанд танилцуулж, бүс нутгийн хамтын ажиллагаанд илүү идэвхтэй оролцох боломжийг бүрдүүлж байна.
