Хууль зүйн сайд Х.Тэмүүжин нэг танхимд тохой залган суугаа Х.Баттулгыг ашиг сонирхолын зөрчилтэй хэмээн тодорхойлж байсан юм. Учир нь ашиг сонирхолын тухай хуулиар Х.Баттулга сайд өөрөө хувьдаа махны, гурилын үйлдвэртэй байж энэ салбарыг тэргүүлэх нь шууд ашиг сонирхолд нь нөлөөлнө гэж үзсэн хэрэг байх л даа. Бас МАН-ынхан АН-ынхан өөрсдийн санаачлан батлуулсан хуулиа хэрэгжүүлдэггүй.  Ашиг сонирхолын тухай хуулиар ашиг сонирхолын зөрчилтэй олон хүн өөрсдийн бизнес эрхэлдэг салбараа тэргүүлэх боллоо. Энэ бол шударга бус явдал. АН-ынхан эхлээд өөрсдөө хуулиа биелүүлэх хэрэгтэй хэмээн гомдоллож байсан.

   Тэгвэл АН-ыг дэмждэг зарим нэгэн бизнес эрхлэгчид хүртэл Х.Баттулга сайдыг ашиг сонирхолын зөрчилтэй учраас бизнест нь саад болж байна хэмээн зарлалаа. Саяхан шинэ жилийн үеэр үндэсний үйлдвэрлэгч ˝Алтан тариа˝ ХХК-ний гурилаар бууз хийж болохгүй байгаа тухай гомдол тасраагүй. Одоо ч үргэлжилж байна. Харин саяханаас тус компани гомдол гаргасан иргэдийн гурилыг эргүүлэн татаж бас сольж өгч эхэлсэн. Иргэдийн энэхүү гомдолд ˝Алтан тариа˝ ХХК-ний захирал П.Цэнгүүн өнгөрсөн долоо хоногт хариу өгч, олон нийтээс дахин дахин хүлцэл өчсөн. Мэдээж гурил нь яагаад ингэж түйхийрэх болсон талаар тайлбар хийсэн юм. Түүний тайлбараар бол энэ жилийн хураалтын буудайгаар гурил хийхээр ингээд байгаа аж. Тиймээс өнгөрсөн жилийн ургац хураалтаас өгөхийг төрөөс хүсчээ. Харин газар тариалангийн салбарыг халамжийн салбар болгосон төр гурил үйлдвэрлэгчидад хатуурхаад өгөөгүй аж. Ингээд л ˝Алтан тариа˝ ХХК энэ жилийн ургац хураалтаа дангаар нь тээрэмдэж гурил үйлдвэрлээд хэрэглэгчиддээ ˝сюрприз˝ барьсан нь буруудсан бололтой.

   Үндэсний үйлдвэрлэгч ˝Алтан тариа˝ ХХК-ний захирал П.Цэнгүүний тайлбараар бол төр тариаланчдыг дэндүү эрхлүүлж байгаа аж. Жил бүр өгдөг урамшуулал нь энэ салбарт төрийн зохицуулалт дэндүү их болж, зах зээлийнх нь зарчим алдагдахад хүргэжээ. Түүнээс гадна Үйлдвэр, хөдөө аж ахуйн салбарыг ашиг сонирхолын зөрчилтэй хүн удирдаж байгаа нь зарим үйлдвэрийн хэвийн ажиллагаанд нөлөөлж эхэлснийг ˝Алтан тариа˝ ХХК-ний захирал П.Цэнгүүн олон нийтэд зарлалаа. Түүний яриагаар бол төртэй ойлголцоход хэцүү болсон гэнэ. Тэрээр энэ талаараа ˝Салбарын сайд нь өөрөө талх, гурил хийдэг хүн байхад би яаж ойлголцох юм. Тэр хүний хувийн ашиг сонирхол байгаа шүү дээ. Газрын дарга нар нь, яамныхан нь тэр чигээрээ тариа тарьдаг, ийм бизнес хийдэг. Тэгэхээр би эдэнтэй  яаж ойлголцох юм бэ˝ хэмээн байр сууриа илэрхийлсэн юм. Үнэхээр энэ яамны удирдлагууд нь өөрсдөө газар тариалангийн бизнес эрхлээд байвал шударга өрсөлдөөн, төрийн бодлого лоббид байр сууриа тавьж өгнө. Тэгээд ч АН-ыханы яриад байдаг ашиг сонирхолын тухай хууль нь хэрэгжихгүй байгаагийн нэг нотолгоо энэ салбарт илэрч байна. Үр дүнг нь иргэд амсана. Учир нь төрөөс хөнгөлөлттэй зээл авч чадаагүй ˝Алтан тариа˝ ХХК-ний буудайн нөөц зургаан сарын нэгэн гэхэд дуусах аж. Тэгээд нөөцгүй учир шинэ ургац хүртэл үйлдвэрээ хаах талаар захирал нь байр сууриа тодорхой илэрхийлсэн. Шинэ ургацыг 10 сард хураана. Тэгээд шууд гурил үйлдвэрлэхгүй. Шинэ ургацыг хоёр сар хэвтүүлж байж тээрэмддэг. Ингэж тооцвол ˝Алтан тариа˝ ХХК- нь бараг л хагас жил хаалгаа барих бололтой. Үндэсний том үйлдвэрлэгч нь хаалгаа ингээд барихаар гурилын үнэ өсөхөөс гадна хомсдол үүснэ. Ийнхүү ашиг сонирхолын асуудлыг зохицуулж чадахгүй бол ардчилсан засгийн үед үндэсний үйлдвэрүүд хаалга барьдаг шинэ жишиг тогтох шинжтэй боллоо.