МАХН-ын дарга Н.Энхбаяр өдгөө Зайсангийн дамжин өнгөрүүлэх хорих 401 дүгээр ангийн нэгдсэн эмнэлэгт хэвтэн эмчлүүлж байгаа. ЭМЯ-наас томилогдсон эмч нарын бүрэлдэхүүн үзлэг шинжилгээ хийн, Н.Энхбаярыг яаралтай Клиникийн хоёрдугаар эмнэлэгт хэвтүүлэх шаардлагатай гэсэн дүгнэлт гаргасан билээ.
    МАХН-ын дарга Н.Энхбаяр өдгөө Зайсангийн дамжин өнгөрүүлэх хорих 401 дүгээр ангийн нэгдсэн эмнэлэгт хэвтэн эмчлүүлж байгаа. ЭМЯ-наас томилогдсон эмч нарын бүрэлдэхүүн үзлэг шинжилгээ хийн, Н.Энхбаярыг яаралтай Клиникийн хоёрдугаар эмнэлэгт хэвтүүлэх шаардлагатай гэсэн дүгнэлт гаргасан билээ. Гэвч Нийслэлийн прокурорын газраас 2002 онд батлагдсан Хууль зүй дотоод хэргийн сайд, Эрүүл мэндийн сайдын 313/316 тушаалаар баталсан журмын дагуу түүнийг шилжүүлэхгүй гэсэн юм. Уг журамд “Хүнд гэмт хэрэгт шийтгүүлсэн ялтныг клиникийн эмнэлэг төрөлжсөн үйлчилгээний төв, орон нутгийн нэгдсэн эмнэлэгт шилжүүлж эмчлүүлэхийг хориглоно” хэмээн заажээ. Тиймээс энэ заалтын дагуу хорих анги Н.Энхбаярыг шилжүүлэх боломжгүй гэсэн билээ.

    Мөн Н.Энхбаярыг шилжүүлэх боломжгүй тул Клиникийн хоёрдугаар эмнэлгийн эмч нарыг хорихын эмнэлэгт очиж, Н.Энхбаярт эмчилгээ үзүүлэхийг шаардсан ч тус эмнэлгийн эмч нар Н.Энхбаярт эмчилгээ хийхгүй хэмээн мэдэгдсэн юм. Учир нь тэд “Бид өдөр болгон олон цагаар хорих яваад байвал хоёрдугаар эмнэлэгт байгаа үндсэн өвчтөнүүдээ эмчилж чадахгүй болно. Тэгэхээр хоёрдугаар эмнэлэгт хэвтэж байгаа иргэдийн ар гэр гомдоллоно. Тэгэхээр бид очих боломжгүй. Харин манай эмнэлэгт шилжүүлэн авчирвал эмчилгээг нь үргэлжлүүлнэ” гэсэн билээ.

    Тиймээс Эрүүл мэндийн сайд Н.Удвал уг журмыг хүний амьд байх эрхийг ноцтойгоор зөрчиж байна хэмээн үзэж, өөрчлөлт оруулсан юм. Уг өөрчилсөн хүсэлтээ Хууль зүйн сайд Х.Тэмүүжинд хүргүүлсэн ч Х.Тэмүүжин сайдаас ямар нэгэн хариу өгөөгүй юм.

    Иймд Эрүүд мэндийн сайд Н.Удвал уг журмаа хүчингүй болгожээ. Ингэснээр МАХН-ын дарга Н.Энхбаяр Клиникийн хоёрдугаар эмнэлэгт хэвтэн эмчлүүлэх боломжтой болж байгаа юм байна.
    
    Уг журмыг хоёр талаасаа харилцан ярилцаж, байж гаргасан учраас нэг нь хүчингүй болгох эрх байдаг аж. Харин Х.Тэмүүжин сайдаас ямар нэгэн хариу өгөхгүй бол энэ журам тэр чигээрээ хүчингүй болох юм байна. Мөн харилцан ярилцаад уг журамд дахин өөрчлөлт оруулах боломжтой аж.

    Юутай ч Эрүүл мэндийн сайд Н.Удвал уг журмыг хүчингүй болгосноор Н.Энхбаяр  Клиникийн хоёрдугаар эмнэлэгт хэвтэн эмчлүүлэхээр боллоо.