Нийслэлийн нутгийн захиргааны байгууллагуудын уламжлалт “Цасны баяр” өдөрлөг Хандгайтад амжилттай зохион байгуулагдлаа. Энэхүү арга хэмжээнд НИТХ, Нийслэлийн ЗДТГ,Нийслэлийн Захирагчийн ажлын албаны харъяа газар, хэлтэс, дүүргүүдийн ЗДТГ, харъяа байгууллагууд, нийслэл, дүүргийн биеийн тамир, спортын газар, хороодын ажилтан, албан хаагчид оролцож, бүтэн өдрийн турш цэвэр агаарт спортоор өрсөлдөн,амралтын өдрөө ая тухтай,сэтгэл өндөр өнгөрүүлэв. Нийслэлийн Засаг даргын мөрийн хөтөлбөрийн зорилтыг хэрэгжүүлэх зорилгоор “Өдөр тутмын биеийн тамир-Өнөөгийн нийслэлчүүдийн өнгө төрх” сэдэвт өвлийн улирлын биеийн тамир, чийрэгжүүлэлтийн үйл ажиллагааны нээлтэнд Нийслэлийн Засаг даргын орлогч Ц.Буяндалай болон албаны бусад хүмүүсүүд оролцож, өвлийн спортын үйл ажиллагааны нээлтийн бамбарыг асааж, “Нийслэлийн 2012 оны шилдэг биеийн тамир, спортын хамтлаг”-аар шалгарсан Улаанбаатар хотын Ус сувгийн удирдах газар, нийслэлийн Барилга, хот байгуулалт, төлөвлөлтийн газар, нийслэлийн Зураг төслийн хүрээлэн, нийслэлийн түргэн тусламжийн төвийн биеийн тамирын “Кобра” хамтлаг болон нийслэл, дүүргүүдийн иргэдийн дунд зохион байгуулсан спортын анхдугаар наадмын дүнгээр тэргүүлсэн Сонгинохайрхан дүүргийн БТСХ, Баянгол дүүргийн БТСХ, Чингэлтэй дүүргийн БТСХ-ны хамт олонд шагнал гардуулав. Нэгдсэн арга хэмжээний хөтөлбөрт багтсан “Олимп-2040. Улаанбаатар” сэдэвт цасан хотхон байгуулах уралдаанд Нийслэлийн цагдаагийн газрынхан түрүүлж, Хан-Уул дүүрэг, нийслэлийн яаралтай түргэн тусламжийн төвийн хамт олон удаалав. Харин цасан дээрх бүжгийн тэмцээнд ХУД-ийн БТСХорооны бүжигчид манлайлж, яаралтай түргэн тусламжийн төвийнхөн аман хүзүүдэн, Автобус-1 НӨҮГ-ын 2-р багийнхан гурвалсан байна. Сурын харваанд цэц мэргэнээ сорьсон харваачдаас Нийслэлийн тагнуулын газрын Д.Баярсайхан түрүүлж, Шүд, эрүү нүүр, эмгэг судлалын төвийн З.Энхбаатар, Нийслэлийн нийтийн тээврийн газрын Н.Лутбилэг нар шилдгүүдийн эгнээнд багтжээ. Байгууллагын нэгдсэн дүнгээр Баянгол дүүрэг, Чингэлтэй дүүрэг, Хан-Уул дүүргийн хамт олон эхний гурван байрт шалгарлаа гэж Нийслэлийн Биеийн тамир, спортын гэзраас мэдээлэв.
