АНУ-ын Калифорни мужийн Уолнат крик хотод гурван жилийн өмнө нэгэн монгол эр буудуулжээ. Калифорнийн монголчуудын нэлээд төвлөрч суудаг Bay Area гэдэг газрын энэ жижигхэн хотод пицца зөөгчийн ажил хийдэг Совдын Баяраа анх 2004 онд АНУ-д очсон байна. Монголд тэрбээр тавилга борлуулагчаар ажилладаг байсан бөгөөд Америкийн визэнд орсон нь бүтсэнээр эхнэр, хүүгийн хамтаар Америкийг зорьжээ. Аар саар ажил хийж явсаар 2008 онд пиццаны газар тогтмол ажилд орж арай хэмээн хөлөө олж эхэлтэл гай тохиолдсон байна.

   Хоёрдугаар сарын 11-нд С.Баяраа өөрийн ажилладаг “Domino"s Pizza” пиццаны газарт ирсэн захиалгын дагуу хүргэлт хийхээр ажил дээрээсээ гарчээ. Ойрхон орших Clayton Road хэмээх гудамжинд орших “Concord” дэн буудалд байсан Пэннсильвани мужийн Питссбург хотын иргэн Клиффорд Вэчэра гэдэг хүн энэ захиалгыг өгсөн аж. Тэрбээр пицца зөөгчийг дээрэмдэхийн тулд л захиалга өгсөн байж. С.Баярааг ирэнгүүт тэрбээр гэнэдүүлэн довтолж, хүргэж ирсэн гурван пицца, тахианы далавч, хоёр литрийн савтай ус, биед нь байсан 20 долларыг буу тулган дээрэмдээд зугатжээ. Монгол залуу зүгээр нэг дээрэмдүүлэхийг бодсонгүй. Тэрбээр гэмт этгээдийн хойноос нь хөөн, барьж авдагийн даваан дээр гэдсэндээ буудуулсан байна. Хэдэн минутын дараа цагдаа нар С.Баярааг буудлаас нэг байшингийн цаана, газар хэвтэж байхыг олж түргэн тусламж дууджээ. Харин гэмт этгээдийг таван өдрийн дараа хоногийн буудалд орогнож байхад нь баривчилсан байна.

   Хэвлийдээ хүнд шархадсан С.Баяраа эмнэлэгт хоёр сар ухаангүй хэвтжээ. Дөрөвдүгээр сард түүнийг ухаан ороход, бие тулгар байсан эхнэр Анна нь амаржиж хүүтэй болсон байв. Хөл дээрээ босохыг өөрөө хичээн зүтгэхийн хажуугаар Bay Area-д суудаг монголчууд гар сунган тусалснаар С.Баяраагийн бие нэлээд сайжирчээ. Гэвч бууны сум дотор эрхтнийг нь чамгүй гэмтээсэн тул хөдөлмөрийн чадвар нь нэлээд хэмжээгээр алдагдаж, спортоор хичээллэдэг байсан нь ч дахин сэргэхээргүй болсоныг С.Баяраагийн эхнэр шүүхэд гаргасан өргөдөлдөө дурьдсан байна. Одоо энэ айлыг тэжээх ганц хүн нь ресторанд зөөгч хийдэг Анна болжээ.   

 Шүүх хурал дууссаны дараа Анна өнгөрсөн гурван жилийн хугацаанд тусалж дэмжиж байсан хүмүүс, эмнэлгийнхэн, мөрдөн байцаагч, шүүх прокурорынхонд талархлаа илэрхийлсэн бөгөөд өдгөө 40 настай С.Баяраа хэргийн талаар ярихыг хүссэн хэвлэлийнхэнд эелдгээр татгалзсан хариу өгсөнийг шүүх хурал болсон Bay Area-гийн Мартинэс хотын сонинд өчигдөр мэдээлсэн байна. “Би сайхан амьдрахын төлөө, аж төрлөө дээшлүүлэхийн төлөө л энд ирсэн” хэмээн түүний хэлсэнийг уг сонин эш татжээ. Шүүгч Саймон О’Коннэл С.Баяраагийн гэр бүлийнхний шүүхэд хандсан хандлагыг сайшаан магтахаар барахгүй хэрэгтэн К.Вэчэрад ч нигүүлсэнгүй хандсаныг нь, өнгөрсөн Баасан гарагт болсон хурал дээр онцлон дурьдсан байна.