УИХ-ын 15 дугаар тойрог Увс аймагт МАН-аас нэр дэвшигч Д.Чойжилсүрэн, Ч.Хүрэлбаатар нар сонгогчдод мөнгө тараасан тухай мэдээлэл баримттайгаа цацагдсан. Хоёр ч шатны шүүхээс Сонгуулийн тухай хууль зөрчсөн хэмээн буруутгагдаад байсан УИХ-ын гишүүн Ч.Хүрэлбаатар, Б.Чойжилсүрэн нарыг буруугүй гэдгийг Дээд шүүх тогтоосон билээ. Тодруулбал АН-ынхан Ч.Хүрэлбаатар, Б.Чойжилсүрэн нарыг УИХ-ын сонгуулийн тухай хуулийн 35 дугаар зүйлийн холбогдох заалтуудыг зөрчсөн гэж үзэж, нэр дэвшигчийн нэрийн жагсаалтаас хасуулах, УИХ-ын гишүүнээр сонгогдсонд тооцож, түр үнэмлэх олгосныг хүчингүй болгуулах тухай нэхэмжлэлийн шаардлагыг гаргасан байдаг. Дээрх нэхэмжлэлийн дагуу Увс аймгийн Захиргааны хэргийн шүүх өнгөрсөн арваннэгдүгээр сарын 22-ны өдөр анхан шатны журмаар хянан хэлэлцээд нэхэмжлэгчийн шаардлагыг үндэслэлтэй хэмээн үзсэн.

     Мөн Захиргааны хэргийн давж заалдах шатны шүүх өнгөрсөн нэгдүгээр сарын 17-ны өдөр давж заалдах шатны журмаар хянан хэлэлцээд анхан шатны шүүхийн шийдвэрийн зарим хэсэгт өөрчлөлт оруулсан. Ингэхдээ Ч.Хүрэлбаатар, Б.Чойжилсүрэн нарыг УИХ-ын гишүүнээр сонгогдсонд тооцож, УИХ-ын гишүүний түр үнэмлэх олгосныг хүчингүй болгож, нэр дэвшигчийн нэрийн жагсаалтаас хасахыг СЕХ даалгасан байдаг. Давж заалдах шатны шүүхээс өөрсдийнх нь эсрэг шийдвэр гарсан болохоор УИХ-ын гишүүн Б.Чойжилсүрэн нарын өмгөөлөгчид Дээд шүүхэд гомдол гаргасан. Тус гомдлын дагуу Захиргааны хэргийн шүүх хуралдаанаар хянан хэлэлцээд нэхэмжлэгч тал болох АН-ын нэхэмжлэлийн шаардлагыг  хэрэгсэхгүй болгосон.

    Гэвч СЕХ Б.Чойжилсүрэн нарын нэрийг хасаагүй. Харин энэхүү асуудлыг Дээд шүүх хянаад СЕХ-г бүрэн эрхийнхээ хүрээнд шийдвэрлэсэн байна гэсэн шийдвэрийг гаргасан юм.

 Тэгвэл одоо УИХ-д Увсын сонгогчдыг төлөөлөн сууж буй Ч.Хүрэлбаатар, Ж.Чойжилсүрэн буцаан татаж оронд нь 28 хувийн босго давсан дараагийн нэр дэвшигчдийг ялсанд тооцох ёстой гэж УИХ-ын нэр бүхий гишүүд үзэж буйгаа илэрхийллээ. Нэр бүхий гишүүд ярихдаа “Сонгуулийн ерөнхий хороо дээрх хоёр гишүүний хууль бус үйлдлийг баталчихаад УИХ-аас эргүүлэн татахгүй байна.  Шүүх нь хууль зөрчсөн буруутай үйлдэл хийсэн гэдгийг нь тогтоосон. Энэ нөхцөлд сонгуулийн ерөнхий хороо буруутай этгээдүүдийг мандатыг нь хүчингүй болгож 28 хувьд хүрсэн нэр дэвшигч байвал УИХ-д сонгогдсонд тооцно. Байхгүй бол дахин сонгууль явуулна. Ийм л ойлгомжтой хууль, заалт байгаа. Энэ хууль болон дээд шүүхийн заалтыг сонгуулийн ерөнхий хороо биелүүлэх ёстой. Энэ нөхдүүд УИХ-д хулгайн аргаар суусан. Шүүхийн маргаан дууссан. Тийм учраас эргүүлэн татах ёстой” гэсэн юм.  Мөн сонгуулийн хуулийн дагуу иргэд авсан мөнгөө өгч баримтаар нотолсон учраас санал худалдан авахын эсрэг хуулийн заалтын дагуу авсан 100 мянган төгрөгөө нэг сая төгрөг болгон буцаан авсан байна. Эдгээрээс гадна тагнуулын байгууллагынхан МАН-ын байрнаас Увс аймагт мөнгө тараасан,  хүлээн авсан гэсэн 1093 гэрээг хураан авсан байна.