Сүүлийн таван сонгууль дараалан далаараа цэвэр тавиулсан МАН-ын шинэчлэлийн үйл явц олон түмний анхаарлыг ихээхэн татах болов. Энэхүү шинэчлэлийн эхлэл ч тавигдлаа. Юуны өмнө МАН-д залуучуудын фракц байгуулснаа албан ёсоор тунхаглаж байна. “Шинэчилье” нэртэй фракцийг УИХ-ын гишүүн Н.Номтойбаяр санаачилан санхүүжүүлж байгаа аж. Түүний удирдлагад УИХ-ын гишүүн О.Содбилэг, Ж.Эрдэнэбат, МАН-ын нарийн бичгийн дарга Л.Оюун-Эрдэнэ, Ж.Мөнхбат нар байна. Мөн НАМОХ-ны тэргүүн Б.Амарсанаа, НИТХ-дахь МАН-ын бүлгийн ахлагч Д.Амарбаясгалан ч оржээ. Үүнээс гадна намаа шинэчилье хэмээх туг барьж ахмад руугаа бурууг чихэх болсон Т.Аюурсайхан, Н.Батсүмбэрэл, Б.Ганхуяг нар орсныг бодоход тэд эртнээс хэний заавраар орилоод байсан нь ойлгогдож эхэлнэ. Эдгээр шинэчлэгч дээр дуучин А.Хаянхирваа, мисс Ё.Нямжав нар нэмэгдсэн нь содон харагдаж байна.
    Гэхдээ эдгээр хүмүүс шинэчлэгчид мөн үү,  эсвэл хариуцлага хүлээгчид мөн үү гэдгийг эхлээд ярих ёстой гэж эх сурвалж мэдээллээ. Учир нь эдгээр эрхэмүүд өөрсдөө намаа сүүлийн таван сонгууль дараалан ялагдахад “үлэмж их хувь нэмэр” оруулагчид гэнэ. Тухайлбал МАН-ын дэргэдэх НАМЗХ-ны ерөнхийлөгч Л.Оюун-Эрдэнэ, дэд тэргүүн Н.Номтойбаяр, О.Содбилэг, Ж.Мөнхбат, Д.Амарбаясгалан НАМОХ-ны тэргүүн болох Б.Амарсанаа, дэд тэргүүн Н.Батсүмбэрэл гээд энэ намын удирдлагад байгаа залуус. Ж.Мөнхбат, Л.Оюун-Эрдэнэ хоёр намын нарийн бичгийн дарга нар.  Д.Амарбаясгалан, Т.Аюурсайхан нар хэлтсийн дарга байсан гээд яриад байвал бүгд одоо намынхаа удирдлагад яваа залуус. Тэднийг байхад л МАН ялагдал хүлээсэн. Тэгсэн мөртлөө намаа ялагдуулсан залуус маань хамгийн түрүүнд уснаас хуурай гарахын тулд үгсэн хуйвалдаж фракц байгуулах нь шударга ариун үйлдэл мөн үү? Харин ч шинэчлэл хийгчид биш хариуцлага хүлээгчид биш үү гэсэн асуулт урган гарч байна. Хариуцлагаас бултахын тулд шинэчлэл яриад бүгдээрээ дайрья гэж шийдсэн бололтой. Уг нь МАН-аа шинэчилье гэж байгаа бол удирдлагад нь байгаа өөрсдөө хариуцлага хүлээж, өөрсдөөсөө шинэчлэлийг эхлэх ёстой байсан биш үү? Яг л Сү.Батболд, У.Хүрэлсүх хоёр шигээ. Ийм мессежүүдийг бүх хариуцлагыг хүлээх болчихоод байгаа ахмадууд нь дүү нартай зориулан бэлджээ.

   Үнэхээр МАН-ын ялагдлын хариуцлагыг Ө.Энхтүвшин, Г.Занданшатар, Т.Бадамжунай, Л.Оюун-Эрдэнэ, Ж.Мөнхбат гээд бүгдээрээ л хүлээх ёстой. Ийм байхад залуус нь гэнэт ах нарыгаа муриад хариуцлагаас зугтаад шинэчлэл ярих нь яавч сайн зүйл биш л дээ. Учир нь “Шинэчилье” фракцийн гол зорилго нь намын үнэт зүйл шинэчлэл ярьж байгаад дахиад намынхаа удирдлагыг гартаа авах гэсэн ганц л зорилготой гэж ахмадууд нь залуусаа дүгнэжээ.
   Гэтэл одоогийн зөрчлийг үүсгээд байгаа залуучууд болон ахмадын хооронд дунд үе гэж байгаа. Тэдний тод төлөөлөл нь Ч.Хүрэлбаатар, С.Бямбацогт, Б.Чойжилсүрэн, Д.Цогтбаатар, Д.Зоригт, Ж.Энхбаяр, Ж.Сүхбаатар, Я.Содбаатар нар юм. Эдгээр эрхэмүүд асуудалд илүү хүлээцтэй хандаж байна. Тиймээс цаашид ах, дүү нарынхаа зохицуулагчаар ажиллаад байхгүй биз. Эдгээрээс Ж.Сүхбаатар л намын орон тооны нарийн бичгийн дарга гэдгээрээ шууд хариуцлага хүлээх болчихоод байгаа. Харин бусад нь бол дүү нар шигээ шууд хариуцлага хүлээх хүмүүс биш л дээ.  
   Ах нарыгаа ингэж буйр зааж байхад дүү нар яаран сандран фракц байгуулж, хариуцлагаас бултаж, дараагийн удирдлагад хүрэх гэж тэмүүлэх нь зөв буруу байсан гэдгийг дүгнэх эрт байна. Мэдээж хариуцлага хүлээх учиртай хүмүүс нь ингэх нь ёс зүйгүй л харагдаж байна.
   Хэрэв намын одоогийн удирдлагад байгаа залуус ингэж байгаа бол Ө.Энхтүвшин, Г.Занданшатар хоёр ч гэсэн нэг фракц байгуулаад бүх бурууг залуус шигээ бусад руу чихээд явбал амжилтанд хүрч мэднэ. Удирдлага хэвээрээ үлдэнэ шүү дээ. Шинэчлэлийг намыг ялагдуулсан хүмүүс нь хийнэ гэж ярих аль хир зохимжтой вэ?