“Ice Top” хамтлагийн экс гишүүн Бадгаа буюу С.Бат-Отгон өнгөрсөн долдугаар сарын 11-нд Шведийн Стокгольм хотын Пэли-Хэссэлби дүүрэгт Арабын иргэн 18 настай эрэгтэйг хутгалж, амь насыг нь хөнөөсөн хэрэгт холбогдон баривчлагдаад байгаа билээ. Гадаад харилцааны яамнаас өмнө нь С.Бат-Отгоны өмгөөлөгчөөр Монгол иргэн ажиллана хэмээн мэдэгдэж байсан ч баттай эх сурвалжийн мэдээллээр түүнийг Араб өмгөөлөгч өмгөөлөхөөр болжээ. Тэрээр эхэндээ араб өмгөөлөгчийг хүлээн зөвшөөрөхгүй “Араб хүнийхээ талд үйлчилнэ” хэмээн хардаж, татгалзаж байсан ч ийнхүү өмгөөллийн үйлчилгээ авахаар болсон байна. Шведийн хууль хяналтын байгууллага түүний хэргийг аргагүй хамгаалалт гэж үзсэн ч зэвсгийн чанартай зүйл буюу хүйтэн мэс хэрэглэж хүний амь хохироосон гэсэн үндэслэлээр ял төлөвлөөд байгаа аж.
Хэргийг сөхвөл, С.Бат-Отгон энэ оны хоёрдугаар сард Шведэд очсон бөгөөд тус улсад цагаачлах виз хүсч, өргөдөл гаргаад хариуг нь хүлээж байхдаа хүн амины хэрэгт холбогдсон аж. Хохирогч залуу нь хөлбөмбөгийн багт хаалгачаар тоглодог хар арьст залуу байсан ба тэд хэрэг гардаг өдөр гудамжинд хамтдаа сагсан бөмбөг тоглож байжээ. Энэ үед хамт тоглож байсан араб залуучууд бөөнөөрөө дээрэлхэн зодож, яс үндсээр нь доромжилж, улмаар С.Бат-Отгоныг зодохоор дайрахад нь хоёр залууг хутгалсан байна. Хутгалуулсан залуус эмнэлэгт хүргэгдсэн боловч 18 настай Ребел Шариф гэгч шархаа даалгүй нас баржээ.
Саяхан С.Бат-Отгоны өмгөөлөгчөөс гэр бүлд нь захидал ирсэн байна. Уг захидалд “Гэр бүлээс нь хүн ирүүлээч, түүнд сэтгэл санааны дэмжлэг хэрэгтэй байгаа” талаар дурдсан аж. Тиймээс түүний хоёр ах тус улсыг зорихоор ХБНГУ-ын Элчин сайдын яаманд очжээ. Гэвч ХБНГУ-ын ЭСЯ-ныхан “Өмгөөлөгчөөс нь эргэх шаардлагатай гэсэн бичиг авчир” гээд буцаасан байна. Тэд өмнө нь нэг удаа дүүгээ эргэхээр виз хүссэн ч татгалзсан хариу авсан байжээ
Б.Чимэг
