Өдөржин, шөнөжин хуралдаж байж өчигдөр баталсан ирэх оны улсын төсөв Сангийн сайд С.Баярцогтод ихээхэн таалагдаж байна. Нэгдсэн төсвийн орлого 5,8 их наяд төгрөг буюу ДНБ-ий 36.1, зарлага 6.3 их наяд төгрөг буюу ДНБ-ий 39 хувьтай тэнцэж байгаа юм. УИХ-ийн чуулган 94,5 хувьтай баталсан хэлэлцүүлгийн явцад орлогыг 600 тэрбум, зарлагыг 90 тэрбум төгрөгөөр бууруулсан байна. Эдийн засагчдын сануулга, дэлхийн зах зээлийн дохиогоор төсвийн алдагдлыг анх удаа гурван хувьтай баталжээ. Энэ тухайд Сангийн сайд “Сэтгэл хангалуун байна” гэж их л сэтгэл хангалуунаар хэлэв. Улсын төсвийн хамгийн их хувийг зарцуулах эрхтэй С.Баярцогт сайд Монголын эдийн засаг хямарч магадгүй гэсэн болгоомжлолыг хойд авдартаа хийгээд түгжив бололтой. Тэрбээр 3,7 их наяд төгрөг зарцуулах эрхтэй болсон. Харин ерөнхий сайд 830 тэрбум, тэргүүн шадар сайд 10.8 тэрбум, шадар сайд 7.6 тэрбум, УИХ-ын дарга 100 сая, Ерөнхийлөгчийн тамгын газрын дарга 20 сая төгрөгийн багцын “эрх” авчээ.

Өнгөрсөн өдрүүдийн хуралдаанаар бас нэгэн гол сэдэв нь “Хүний хөгжил сан”-гийн тухай байв. Иргэдэд амласан мөнгөө хэрхэн тараах вэ гэдгээ өчигдөр эцэслэн шийдэв. Ирэх оны хоёрдугаар сарын нэгнээс нэг сая төгрөгтэй тэнцэх хувьцааг иргэдэд олгохоор болсон нь МАН-ын зарим гишүүдийг бага зэрэг бухимдуулав. “Хэрэв сая төгрөгийг хувьцаагаар өгвөл АН-ын мөрийн хөтөлбөр биелчих гээд байна. 2008 оны сонгуулиар МАН бэлнээр, АН хувьцаагаар өгнө гэж амласан” гэх нь байлаа. Сангийн сайд үүнд хэрэв иргэд хувьцаа авахгүй гэвэл Засгийн газарт эргүүлээд зарж болно. Зарахгүй, хадгалвал үнэ нь 2-10 дахин өсөх боломжтой гэсэн тайлбарыг өгч, аль аль намын мөрийн хөтөлбөр биелсэн гэж дүгнэсэн юм.

Б.Баяр