Улс төрчдийн уур бухимдалаа гаргадаг эцсийн арга нь хэн нэгний өмнөөс салаавч гаргах бололтой. Сүүлийн үед улс төрчид бие бие рүүгээ, төрийн албан хаагчид руу олны нүдэн дээр салаавч гаргах нь олширчээ. Зарим нь бүр мода болгох шинжтэй. Төрийн албан хаагч руу салаавч гаргаж, доромжилсон гэж эхнээсээ тэнсэн харгалзах ял авч эхлээд байхад бүр төрийн ордон руугаа нийтээрээ нийлж байгаад салаавч үзүүлсэн цадиггүй явдал гарлаа. Цагтаа Сангийн яамны дэд сайд байсан “талх судлаач” хочтой Ч.Ганхуягийн тэргүүлсэн хэсэг “жиргээчид” ам.долларын ханш 1750-д хүрлээ гэж УИХ-ын дарга З.Энхболд, Ерөнхий сайд Н.Алтанхуяг нарт хандаж салаавч “илгээлээ”. Эдийн засаг хямарч байгаа нь үнэн, төрийн “толгойнууд” яаралтай арга хэмжээ авахгүй, шалтаг тоочиж суугаа нь үнэн. Гэхдээ Сангийн яамны дэд сайдаар ажиллаж байсан, өөрийн гэсэн банктай, эдийн засагч хүний хувьд хямралаас гарах арга замыг зөвлөөд суухын оронд хэдэн “завтай” нөхөдтэй нийлж төрийн ордон руу салаавч үзүүлэн зогсож байгаа нь хэнд ч таалагдсангүй.

   Ч.Ганхуяг талхны үнэ мэдэхгүй байснаасаа болж улс төрд үлдэх рейтинг нь унаж байсан удаатай. Түүнд өдгөө салаавч үзүүлэн доромжилж байгаа Төрийн ордон дотор сууж байх юмсан гэсэн хүсэл байж л байсан. Тэрбээр 2012 онд УИХ-ын гишүүн болохоор Сүхбаатар дүүрэгт нэр дэвшин ялагдаж байсныг хүмүүс мартаагүй. Бас Сү.Батболдыг Ерөнхий сайд байхад нь эдийн засаг, хөгжлийн асуудлын зөвлөхөөр ажиллаж, төрийн ордонд манаргаж л явсан нэгэн. Гэтэл одоо ингээд хийх юмаа олж ядсан мэт УИХ-ын дарга, Ерөнхий сайддаа салаавч “илгээгээд” зогсож байх гэж. Уг нь бол ам.долларын ханш өсч байгаа нь ийм учиртай, ингэвэл эргээд буурна шүү гээд эдийн засагч хүний хувьд зөвлөөд явбал хэн хэнд нь ашигтай баймаар. Сөрөг хүчний дуу хоолой гээд заавал бүдүүлэг загнах ёстой гэсэн үг биш. Ч.Ганхуяг өөрөө “Хас” банкыг хөл дээр нь босгосон хүн. Гэтэл “долларын ханш зах зээлийн жамаар өсөөд байна, эргээд бууна гэсэн” эрх баригчдын үгийг сонсохыг ч хүссэнгүй бололтой.


   Өмнөх түүхийг саная. Чуулганы танхимд УИХ-ын гишүүн Г.Баярсайхан У.Хүрэлсүх руу салаавч гаргаад “ухамрын шанаа” амсаж байв. Хэрэв У.Хүрэлсүх түүнийг нэр хүндэд халдлаа гээд зургаа бариад шүүхийн хаалга руу гүйсэн бол эвгүйтэх л байлаа. УИХ-ын гишүүн Ц.Шинэбаяр өмнө нь нэг ч харж байгаагүй төрийн албан хаагчид руу салаавч гаргаад нэг жилийн тэнсэн ял авсан. Эвгүйтвэл Ч.Ганхуягийг УИХ-ын дарга, Ерөнхий сайдыг доромжилж, танхайрсан хэрэгт унаж ч мэдэх юм. Ч.Ганхуяг өмнө нь талхны үнэ мэдэхгүйгээсээ болж рейтинг нь унаж, түүнийгээ тайлбарлах гэж бүр бантан хутгаж орхиод “талх судлаач” нэртэй болсон. Харин одоо төрийн ордон, эрх баригчид руу салаавч гаргасан хэргээ "баатарлаг үйлс" гэж бардаад байлгүй чимээгүйхэн өнгөрөхгүй бол “дахин улс төрд орох” энэ тэр гээд хүсэл нь биелэхэд улам л холдоод байх шиг.