СЭЗДС-ийн захирал Д.Батжаргал нэгэн амралтын газрын тогооч руу хутга барьж дайрсан хэрэг гарчээ. Тэрбээр 9-р сарын 3-ны өдөр Төв аймгийн Баянчандмань суманд байдаг амралтын газар өөр дөрвөн хүний хамт очихдоо агсан тавьж, хутга барин сүрдүүлж буй бичлэг интернетээр цацагдаад байна. Д.Батжаргал их хэмжээгээр согтсон үедээ үйлчилгээний чанар муу байна гэхээс гадна шөнө архи гаргаж өг хэмээн агсан тавьсан аж. Тэрбээр амралтын газрын ажилчдыг хэл, амаар сүрдүүлсэн ч үүнийгээ согтуудаа хийсэн үйлдэл, маргааш нь бичлэг хараад мэдсэн гэх тайлбарыг eagle.mn-д өгчээ.

    Хохирсон тогооч энэ явдалд "хүн алахаар завдсан, танхайрсан" гэж гомдол гаргасан бөгөөд Баянчандмань сумын цагдаагийн газраас түүнийг 100 мянган төгрөгөөр торгоод өнгөрөөжээ. Тэрбээр согтуу байхдаа ийм болчимгүй үйлдэл гаргасандаа амралтын газрын тогоочоос уучлалт гуйсан ч "Тэр амралтын газрын үйлчилгээ, чанар үнэхээр муу байсан. Тийм муу үйлчилгээтэй амралтын газарт битгий очиж байгаарай гэж энэ дашрамд анхааруулмаар байна" гэж нэгэн хэвлэлд ярьжээ.