Эрүүл мэндийн яам, Жендэрийн үндэсний хороо, НҮБ-ын ХАС-тай хамтран Жендэрийн эрх тэгш байдлыг хангах тухай хуулийг хэрэгжүүлэх дунд хугацааны стратеги, Жендэрт суурилсан хүчирхийллийн асуудлаар эрүүл мэндийн яамны ажилтнуудад арга зүйн дэмжлэг үзүүлэх зорилгоор өнөөдөр таницуулах уулзалтыг зохион байгууллаа.Жендэрийн үндэсний хорооны нарийн бичгийн дарга бөгөөд Ажлын албаны дарга М.Болормаа уг уулзалтыг нээж хэлсэн үгэндээ, “Жендэрийн үндэсний хорооноос төрийн байгууллагуудтай хамтран энэхүү уулзалтыг зохион байгуулахаар төлөвлөсөн юм. Өнөөдөр Эрүүл мэндийн яамны ажилнуудтай хийх уулзалтаар ажлаа эхлүүлж байгаадаа баяртай байна. Бас их онцлог болж байна. Учир нь бусад салбарыг бодвол эрүүл мэндийн салбарт жендэрийн асуудал түлхүү яригддаг. Жендэр гэдэг зөвхөн эмэгтэйчүүдэд хандсан асуудал биш. Нэг үгээр хэлбэл, эрэгтэй, эмэгтэй хүмүүсийн хэрэгцээ, шаардлагыг хангахад чиглэсэн бодлого. Тиймээс Жендэрийн үндэсний хорооноос төрийн байгууллагуудын хамтын ажиллагааг сайжруулж, үр дүнд хүрэх хамтын бодлого хэрэгжүүлэхээр ажиллаж байна” хэмээв. Мөн тэрээр эрүүл мэндийн салбар бусад салбаруудад жендэрийн тэгш байдлыг хангасан, үлгэр дуурайл үзүүлэхүйц жишиг салбар болно гэдэгт итгэлтэй байгаагаа илэрхийлсэн.
Эрүүл мэндийн салбарын хувьд эмнэлгийн үйлчилгээндээ түшиглэн нэг цэгийн үйлчилгээг хүчирхийлэлд өртсөн эмэгтэйчүүд, хүүхэд, ахмад настнуудад тусламж үзүүлэх боломжтой. Хүний эрхийг хамгаалсан нэг цэгийн тусламж үйлчилгээ үзүүлэх нь хүчирхийлэлд өртөж, сэтгэл санааны хүнд дарамтад орсон хүмүүст туслах ач холбогдолтой.
Харин эрчүүдийн эрүүл мэнд улс орны хөгжилтэй шууд уялдах болсон. Уул уурхай, барилгын салбар эрчимтэй хөгжиж байгаатай холбоотойгоор хөдөлмөрийн аюулгүй байдал алдагдаж, тэр хирээрээ осол гэмтэл их гарч байна. Сүүлийн жилүүдэд нас барсан болон хөгжлийн бэрхшээлтэй болсон хүмүүсийн дийлэнх нь залуучууд болжээ. Тиймээс эрүүл мэндийн салбарын мэргэжилтнүүд энэ асуудлыг анхааралдаа авч, хамтран ажиллахыг Жендэрийн үндэсний хорооны нарийн бичгийн дарга бөгөөд Ажлын албаны дарга М.Болормаа танилцуулгадаа дурьдлаа хэмээн ЭМЯ-аас мэдээллээ.
