Ардчилсан нам болон Увс аймгийн Тариалан сумын Х.Баярсайхан нарын 13 иргэн шинээр илэрсэн нөхцөл байдлыг хянуулах хүсэлтээ Улсын дээд шүүхэд гаргасан байна.  Улсын дээд шүүх хүсэлтийг хүлээн авч маргааш хэлэлцэхээр болжээ.

Өөрөөр хэлбэл, МАН-аас нэр дэвшсэн Ч.Хүрэлбаатар, Б.Чойжилсүрэн нарын туслахуудын мөнгө тараасныг тогтоосон  эрүүгийн хэргийн шүүхийн шийдвэр нь захиргааны маргааныг дахин хэлэлцэх шинэ нөхцлийг бий болгосон аж. Тодруулбал, Ч.Хүрэлбаатар, Б.Чойжилсүрэн нарыг нэр дэвшихдээ УИХ-ын сонгуулийн тухай хуулийг зөрчөөгүй гэсэн шийдвэрийг хяналтын шатны захиргааны хэргийн шүүх хурлаас гаргасан. Гэтэл маргааш нь сонгуулийн сурталчилгаанд ажилласан Увс аймгийн МАН-ын дэд дарга Н.Жамсран, Б.Чойжилсүрэнгийн туслах Я.Баттогтох, Ч.Хүрэлбаатарын туслах Ш.Чинбат, Я.Лхагва, Т.Гансүх нарыг сонгогчдод мөнгө тараасныг хяналтын шатны эрүүгийн хэргийн шүүхээс тогтоож, тэдэнд торгох ял ногдуулсан байдаг.

Хуулиараа мөнгө тараалгасан, тараасан хоёр хоёулаа гэм буруутайд тооцогдох учиртай. Өөрөөр хэлбэл, Монголд үйлчилж буй хүчин төгөлдөр хуулиар тэдэнд холбогдох эрүүгийн хэргийг эцэслэн шийдсэний дараа захиргааны маргааныг шүүх хэлэлцэх ёстой байжээ.

Хэрвээ Дээд шүүх гуравдагч этгээдээс ирүүлсэн нэхэмжлэлийн шаардлагыг хүлээн авч, шинээр илэрсэн нөхцөл байдалд тооцвол Ч.Хүрэлбаатар, Б.Чойжилсүрэн нарын УИХ-ын сонгуулийн хуулийг зөрчсөн эсэхийг шүүх анхан шатнаасаа дахин хэлэлцэх юм.