Хүүхдүүд газ, цавуу үнэрлэж мансуурч байна. Архи ууж танхайрч, нэгнийгээ хүчиндэж байна гээд л бага насны хүүхдүүдийн талаар сөрөг мэдээлэл хаа нэгтээгээс сонсогдсоор. ..

Ямарваа нэгэн үйл хэргийн хар барааныг нь дандаа бичиж байхын гэж зарим нэг нь бодох байх л даа. Гэвч бичихээс өөр аргагүй, хөндөх зайлшгүй хэрэгтэй асуудлууд хөвөрсөөр. Эцэг эх нь болох “томчуудад” анхааруулах зайлшгүй нөхцөл тулгарч байна.

Хүүхэд чинь юу сэтгэж, бодож, төлөвлөж байна. Ямар хүмүүстээ найзалж нөхөрлөж байгааг та мэдэх үү?. Мөн хүүхэд чин гэртээ хонож байгаа эсэх зан ааш нь өөрчлөгдөж байна уу үгүй юу гэдгийг та ажиглаж үзсэн үү?
Энэ удаагийн хөндөх гэж байгаа сэдэв бол хар тамхи, мансууруулах бодис. Манай оронд гэхээсээ илүү гадны аль нэг улсад хар тамхи хэрэглэж байгаа хүмүүсийн талаарх мэдээлэл бараг байнга шахуу цацагддаг. Гэтэл одоо энэ аюул бидэнд нүүрлээд ирлээ.

  Мансууруулах, сэтгэцид нөлөөлөх эм бэлдмэл, өвс ургамал хэрэглэсэн хүүхдүүдийн тоо яагаад ингэж эрс ихсэв. Мөн чухам ямар учраас энэхүү зүйлийг залуучууд түлхүү хэрэглээд байна гээд л олон асуултууд гарч ирсээр байна. Ихэвчлэн 16-25 насны залуучууд, насанд хүрээгүй хүүхдүүд мансууруулах, сэтгэцэд нөлөөлөх ургамал хэрэглэсэн талаар сүүлийн долоо хоногуудад 4-5 удаа гарлаа.

Уг нь цагдаагийн байгууллага мэргэжлийн байгууллагатай хамтраад энэ намар мансууруулах үйлчилгээтэй өвс ургамлыг устгах ажил хийсэн. Гэвч сүүлийн үед мансууруулах төрлийн үйлчилгээтэй өвс насанд хүрээгүй хүүхдүүд хэрэглэсэн, мөн залуус нэгнээ уруу татаж өвс татсан гэх мэдээллүүд гарах болсон. Түүнчлэн манай улсад амьдардаг хятад иргэн их хэмжээний сэтгэцид нөлөөлөх ургамлыг гэртээ хадгалж байсан нь тогтоогдож одоо байцаагдаж байгаа юм.

    Ингээд ЦЕГ-ын хэвлэл мэдээллийн ажилтан, цагдаагийн ахмад Ё.Лхагвасүрэнгээс сүүлийн үед гарсан мансууруулах бодистой холбоотой хэргүүдийн талаар тодрууллаа.

-Сүүлийн өдрүүдэд хар тамхи, мансууруулах бодистой холбоотой ямар хэргүүд гарав?
-Өнгөрсөн долоо хоногт л гэхэд гурван хэрэг илэрсэн. Тухайлбал, 16 настай Э гэгч нь мансуурч байсныг нь даслан зогсоож, ногоон өвс маягийн зүйлийг хураан авсан. Одоогоор шинжилгээн өгсөн байгаа. Тэгэхлээр өнгөрсөн долоо хоногт мөн зочид буудалд дөрвөн залуу мансуурсан байдалтай байсныг нь цагдаагийн байгууллага илрүүлсэн. Тухайн хүмүүсээс цэнхэр ууттай өвс, гаанс хэлбэрийн сав зэргийг хураан авч шалгалтын ажиллагааг үргэлжлүүлж байна.

-Өнгөрсөн онд хэчнээн хар тамхитай холбоотой хэрэг гарсан бэ?
-Өнгөрсөн оны хувьд мансууруулах, сэтгэцид нөлөөлөх гэмт хэрэг 36 бүртгэгдсэн. Үүнээс 194 хүнийг холбогдогчоор шалгаж, эрүүгийн хэрэг үүсгэсэн байна.  Энэ жил эхний найман сарын байдлаар 26 хэрэг бүртгэгдсэн байна. Одоогоор 21 иргэн холбогдогчоор нь шалгагдаад явж байна.

-Тэгэхээр мансууруулах бодис зарсан болох хэрэглэж байгаа хүмүүст тус тусад нь ямар хариуцлага оноодог юм бол?
-Эрүүгийн хуулийн 2 дугаар бүлэг 102 дугаар зүйлд мансууруулах, сэтгэцид нөлөөлөх эм бэлдмэл, бодисыг хууль бусаар бэлтгэх, хадгалаж, тээвэрлэж борлуулсан бол 5-8 жил хүртэлх хугацаагаар хорих ял шийтгэнэ.  Мөн Монгол Улсын эрүүгийн хуульд зарим төрлийн гэмт хэрэгт насанд хүрээгүй хүүхдийг эрүүгийн хариуцлага тооцно гэж заасан байдаг.

-Яг ямар учраас хүүхдүүд мансууруулах төрлийн өвс, ургамал татаж байна. Энэ талаар судалгаа хийсэн байдаг уу?
-Сэтгэц мансуурлын бодист хүүхэд залуусыг уруу татах гол шалтгаан нь энэ бодисыг зарж борлуулж байгаа хүмүүс хүүхдүүдэд эхний ээлжинд ургамал, бэлдмэлээсээ үнэгүй өгдөгт оршино. Ер нь үнэгүй өгөөд тухайн бодист хамааралтай болсон үед нь үнээ нэмж ашиг олох арга хэрэглэдэг. Тэгэхээр хүүхэд залуустаа хандаж хэлэхэд, сэтгэц мансууруулах төрлийн бодисыг битгий хэрэглэ. Мансууруулах бодис нь хүний эрүүл мэнд, сэтгэцид муугаар нөлөөлдөг болох нь шинжлэх ухаанаар батлагдсан. Энэ бодисыг удаан хугацаагаар хэрэглэвэл бие махбодид дасал болж энэхүү бодисыг заавал хэрэглэх сэдлийг төрүүлдэг. Тэгэхээр биед нь зовиур илрэх үед нь өнөөх бодисыг хүмүүс өндөр үнээр зарж борлуулж эхэлдэг. Эрүүгийн цагдаагийн газраас бүх хууль бус үйл ажиллагаа явуулсан хүмүүсийг илрүүлэн шалгаж байгаа. Илрүүлсэн бүлэглэлүүд байгаа.

-Хэчнээн мансууруулах бодис зардаг бүлэглэлийг илрүүлэв?
-Өнгөрсөн жил 5-6 бүлэглэлийнхэнд эрүүгийн хэрэг үүсгээд Прокуроын байгууллагад шилжүүлсэн байгаа.

Тэгэхээр манай улсад бүр хар тамхины бүлэглэл, маф гээч нь бий болчихсон хүүхэд залуусыг энэ зүйлрүү эргэлт буцалтгүй оруулж байна. Мөн гадныхан эх оронд минь ирж эл бузар бизнесээ түгээж байгаа юм. Чухам энэ бүхэнтэй бүх нийтээрээ хамтарч тэмцэж эргэн тойрныхоо хүмүүст анхаарал тавьж буруу зүйлд татагдахаас урьдчилан сэргийлэх хэрэгтэй байна. Мөн хүүхдүүд энэ төрлийн бодис ямар их аюултай болохыг мэдэхгүй байна. Хар тамхи, мансууруулах бодисны хор хөнөөлийн талаар огтхон ч мэдлэг алга. Тиймээс хичээлийн хөтөлбөрт нь үүнийг тусгаж өгөх хэрэгтэй байгааг холбогдох албаныхан анхаарвал зүйтэй.