МУИС-ийн бүтэцийн өөрчлөлт нийгэмд дуулиан тарьж байна. Учир нь МУИС-ийн одоогийн удирдлага багш, оюутнуудынхаа саналыг сонсохгүйгээр 10 гаруй сургуулиа дөрөв болгож өөрчлөх гэсэн нь ихээхэн эсэргүүцэлтэй тулгарлаа.

    МУИС-ийг цомхон болгох гэсэн энэхүү бодлого амжилттай хэрэгжвэл ЭМШУИС, ШУТИС, ХААИС гэх мэт бусад сургуулиудад ч гэсэн үргэлжилж нэгтгэх процесс явагдана гэж эх сурвалж мэдээллээ.

    Төрийн өмчит их, дээд сургуулиудыг ийнхүү шинэтгэх процессыг ашиглаж “чоно борооноор” гэдэг шиг үйл явц өрнөж байна. Учир нь МУИС-ийн нэг бүрэлдэхүүн болох Улаанбаатарын Их сургуулийг салгаж хувьчлах гэсэн улс төр, бизнесийн бүлэглэл сүүлийн хэдэн жил эрчимтэй ажиллажээ. Тэдний тооцоогоор МУИС-ийн дотоод сургуулиудыг нэгтгэх өрнөлийг ашиглан Улаанбаатарын Их сургуулийг салгаж авахаар шийджээ. Энэхүү луйварын ажиллагаанд АН-ынхан нилээд идэвхитэй оролцож байгаа аж.

    Үйл явцыг эргэн санавал Ерөнхий сайд Сү.Батболд төрийн өмчит их, дээд сургуулийг 2011 оны орчим нэгтгэх шийдвэр гаргажээ. Тэр шийдвэрийн дагуу Улаанбаатарын Их сургууль, Худалдаа үйлдвэрлэлийн дээд сургууль зэрэг хэд хэдэн сургуулийг МУИС-д нэгтгэхээр болжээ. Энэ нь мэдээж Улаанбаатарын Их сургуулийг хувьчилж авах гэж төлөвлөж байсан улс төрчдийн эрх ашгийг хөнджээ. Ингээд нэр бүхий улс төрчид Ерөнхий сайд Сү.Батболдод дарамт үзүүлж шийдвэрээ цуцлахыг нэг бус удаа хүсчээ. Харин Сү.Батболд “төрийн өмчийн сургуулийг хэн нэгэн шууд хувьчилж авахыг зөвшөөрөхгүй. Төрийнх нь сургуультай нэгтгэсэн шийдвэрээ цуцлахгүй. Хувьчилж авах гэж хүсээд байгаа бол ард түмнээсээ асуу” гэсэн утгатай үг хэлээд хөдлөөгүй аж. Тухайн үеийн Засгийн газрын тэргүүний энэхүү хатуу байр суурийн эсрэг нэгэн гаргалгааг гаргаж иржээ. Тэр нь Улаанбаатарын Их сургууль ШУА-ийн харья хэмээх нотолгоо байж. ШУА нь төрөөс санхүүжилт авдаг төрийн бус байгууллагын статустай газар. Үүнийг сонссон Сү.Батболд бас л дургүйцжээ. “Төрийн бус байгууллага яахаараа дэргэдээ сургуультай байдаг юм бэ? Тэгээд төрийн өмчөөр байгуулагдсан сургуулийг төрийн бус байгууллагынх гэх мэт дэмий юм ярьж ард түмнийг доромжилохоо боль” гээд хоёр дахь удаагаа халгаагаагүй гэнэ. Ингээд Сү.Батболдын үед Улаанбаатарын Их сургуулийг МУИС-аас салгах нь бүтэхгүй зүйл болжээ. Гэвч улайрсан улс төрчид сонирхолоосоо буцаагүй байна. Сү.Батболдын дараагийн дарга болох Ө.Энхтүвшин нэг хэсэгтээ Улаанбаатарын Их сургуулийг хувьчлах асуудлыг хөөцөлдөөд бараагүй аж.

    Харин АН-ын Засгийн газар гарч ирсэн нь эртнээс Улаанбаатарын Их сургуулийг МУИС-иас салгах гэсэн хэсэг бүлгийнхэнд сайхан боломжийг нээжээ. Тэд Ерөнхий сайд Н.Алтанхуяг, БСШУ-ны сайд Л.Гантөмөр нарын дэмжлэгийг авч эхэлжээ. Тиймээс МУИС-ийн шинэ бүтэцийг хэлэлцэхдээ Улаанбаатарын Их сургуулийг оролцуулахгүй байх шийдвэрийг гаргуулж дөнгүүлсэн байна. Бас ТӨХ-ныхон ч Улаанбаатарын Их сургуулийг хувьчилж болох талаар судалж эхэлжээ. Тиймээс МУИС-ийн одоогийн шинэчлэлийн асуудалд Улаанбаатарын Их сургуулийг оролцуулахгүй байна. Энэ ажлыг гардан хөөцөлдөж байгаа хүн нь Улаанбаатарын Их сургуулийн захирал С.Байгалсайхан аж. Түүний ард АН-ынхан сууцгааж байгаа гэнэ. Ийнхүү төрийн өмчийн сургуулийг луйварын аргаар МУИС-иас салгах ажиллаага амжилттай үргэлжилж байна. МАН-ын Засгийн үед амжилт олоогүй асуудал АН-ын үед хэрэгжиж магадгүй болов. Эх сурвалжийн мэдээлж байгаагаар бол энэ ганц үйлдлээр  МАН, АН хоёрын сонирхолын зөрөө харагдаж байгаа аж.

    Улаанбаатарын Их сургууль нь 1992 онд байгуулагдсан. Технологи, нийгмийн ухаан, хэл зохиолын гэсэн хэдэн факультет, мэргэжлийн 11 тэнхим, 150 гаруй багш, 50-иад ажилтан, 2000 гаруй оюутан, 100 гаруй магистрант, докторанттайгаар үйл ажиллагаагаа явуулж байгаа хэд хэдэн томоохон үл хөдлөх хөрөнгөтэй, санхүү эдийн засгийн хувьд ашигтай ажилладаг гэнэ. Ийм нэгэн том сургуулийг ардчилагчид МУИС-иас салган хувчилахаар улайрч байна.