УИХ-ын гишүүд нэг зүйл дээр их нэгдэж, нэг хүн шиг байх юм. Тэр нь "зэрэг инээх". Өөрсдийг нь доромжилсон байсан ч, бусдыг доромжилсон байсан ч "нирхийтэл" инээлдээд л байна, инээлдээд л байна. Монгол Улсын хууль тогтоох дээд байгууллагад орж суучихаад ёс зүйгүй хэрүүлээ баруун солгойгүй тарьж суух нь бас егөөтэй.

Үгний цаана үг нууж, битүү хатуу утгатай үг чулуудалцаж, мэдрэмжгүй аашилж буй өнөөдрийн жишээ бол УИХ-ын гишүүн Б.Пүрэвдорж, П.Сайнзориг хоёр.

Тухайлбал, Б.Пүрэвдорж гишүүний "О.Номинчимэг гишүүн хуулиар олон жил явсан зарим юман дээр гайгүй шүү" гэсэн үгийг сонсонгуутаа бүгд хөхрөлдөөд, өнөөхийг нь П.Сайнзориг гишүүн өлгөж аваад "О.Номинчимэг та хоёрын ямар харилцаагаараа гайгүй гэдгийг мэдэхгүй байна" гэж байх жишээтэй.

Энэ бол хоёр хүн дундаа нэг эмэгтэй хүний нэрийг хавчуулаад хэрэлдэж байгаа асуудал ердөө биш. Салаа, саармаг утгатай, егөөдөж хэлсэн үгээрээ нэр төрд нь халдаж байгаа л хэлбэр.

Ийм ёс зүйгүй, увайгүй яриаг парламентын танхимд баавартай шидэлцэж, бусад нь хөхрөлдөж суугаа нь ёс суртахууных нь хэм хэмжээг л харуулж байна. 

М.Гал