Он гарснаас хойш барилгын салбарт цөөнгүй осол гарч, хүний амь нас эрсдсэн.   Үүнтэй холбогдуулан Мэргэжлийн хяналтын ерөнхий газар, нийслэлийн мэргэжлийн хяналтын газраас өвлийн улиралд барилгын ажил явуулж байгаа барилгын салбарт  шалгалт хийсэн талаар бид мэдээлсэн. Шалгалт өнгөрсөн нэгдүгээр сарын 15-24-ны хооронд явагдсан байна. Энэ шалгалтанд таван дүүргийн нутагт дэвсгэрт баригдаж байгаа 45 обьект хамрагдсан. Эдгээрээс ерөнхий гүйцэтгэгч 49, туслан гүйцэтгэгч 115 аж ахуй нэгж байгууллага, 14 бригад барилгын ажил явуулж байсан байна. Үүнээс  дотор заслын 62, лифт угсралтын долоо, гадна фасатны ес, дотор өрлөгийн ес, сантехник дулааны 17, цахилгаан бусад монтажны 16 чиглэлэээр үйл ажиллагаа явуулж байжээ. Шалгалтад хамрагдсан 45 обьектоос  найман обьект дулаанаа авалгүйгээр барилгын ажил гүйцэтгэж байсан байна. Харин Чингэлтэй, Багануур, Налайх дүүргүүдэд барилгын ажил зогссон байдалтай байжээ.

Шалгалтаар нэлээд зөрчил илэрсэнийг албаныхан онцолж байна. Улмаар барилгын компаниудад дотоод хяналт шалгалт хийдэггүй. Дотоод хяналт шалгалт муугаас болж осол аваар их гарч байна гэв. Шалгалтаар хөдөлмөрийн аюулгүй байдал, эрүүл ахуйн талаарх хууль тогтоомжийг хэрэгжүүлээгүй, стандарт шаардлага хангаагүй таван барилгын үйл ажиллагааг улсын байцаагчийн актаар зогсоожээ. Энэ талаар Нийслэлийн мэргэжлийн хяналтын газрын дэд дарга М.Баасандоржоос тодруулахад "Баянгол дүүрэгт “Эф-Ай-Кэй-Эй-Эн-Жи” ХХК,  “Юнико констракшн”, “Амеро оргил” ХХК, “Оточ ноёдууд” ХХК,  Хан-Уул дүүрэгт  “Форус алюмуниум” ХХК –иудын үйл ажиллагаа хаасан байгаа. Хөдөлмөрийн аюулгүй байдал, эрүүл ахуйн тухай хууль, Хөдөлмөрийн тухай хуулийн холбогдох заалтыг хэрэгжүүлж ажиллагаагүй арван аж ахуйн нэгж байгууллагад 5.5 сая төгрөгийн шийтгэвэрийн арга хэмжээ авсан" гэв.