МҮБХ –ноос цагаан сарын барилдаанд учраа бөхийнхөө гарыг хөшиж жудаггүй зан гаргасан Хөвсгөл аймгийн харьяат Ц.Содномдорж харцагын барилдах эрхийг дөрвөн сараар хассан. Харцага сар гаруйн өмнө барьц буруу халсан учраас барилдааны дундаас мөн л хасагдаж байсан. Ирэх зургаадугаар сар хүртэл барилдах эрхийг нь хассан учраас тэрээр энэ хугацаанд нэг ч барилдаанд зодоглох боложмгүй. Тэрээр хэвлэлд өгсөн ярилцлагадаа “Заалны барилдаанд барилдахгүй байна гэдэг бол бэлтгэл сургуулилалт тасрах хамгийн том шалтгаан. Би энэ жилийн наадамд барилдах эсэхээ хараахан шийдээгүй л байна. Магадгүй миний бэлтгэл өмнөх үеийн төвшинд хүрэхгүй бол энэ жилдээ өнжих бодолтой байгаа. Би цолоо ахиулах хэмжээнд барилдаж чадахгүй бол наадамд зодоглох хэрэг алга.” гэж ярьжээ. Хэдийгээр жудаггүй зан гаргасан ч гэсэн Ц.Содномдорж харцагын уран хурц барилдаан энэ жилийн наадамд үгүйлэгдэх нь гарцаагүй биз ээ.