Архи согтууруулах ундааг хэтрүүлэн хэрэглэсэн иргэдийг эрүүлжүүлэх байранд авчирдаг. Ингэснээр тухайн иргэн гэмт хэрэг зөрчилд холбогдох, цаашлаад амь насаараа хохирох эрсдлээс урьдчилан сэргийлдэг учиртай. Тэгвэл цагдаагийн тухай хуулинд нэмэлт өөрчлөлт, шинэчлэлтүүд орсоноор энэ оны эхний өдрөөс эрүүлжүүлэх байрыг татан буулгаж оронд нь хордлого тайлах төв, албадан саатуулах байрыг бий болгохоор болсон. Өөрөөр хэлбэл,  "Эрүүлжүүлэх байр нь цагдаагийн төв байгууллагын харьяалалд ажиллана" гэдэг заалтыг  "Эрүүл мэндийн асуудал эрхэлсэн төрийн захиргааны" болгон өөрчилжээ. Мөн "цагдаагийн алба хаагч" гэснийг "түргэн тусламжийн төвийн ажилтан, эрүүлжүүлэх байрны ажилтан"  гэж өөрчилсөн юм. Улмаар хуулийн хэрэгжилтийг хангуулахын тулд ажлын хэсэг хүртэл томилогдон ажиллаж байгаа.

Гагцхүү энэхүү хуулийн хэрэгжилтийг биелүүлэх боломжгүй гэсэн саналыг Эрүүл мэндийн сайд Н.Удвал, эрүүл мэндийн үйлчилгээ үзүүлдэг эмч, ажилчдын зүгээс хүргүүлсэн. Гэвч нэгэнт батлагдсан хууль хэрэгжих ёстой гэсэн хатуухан шаардлагыг тэдэнд тавьсан. Харин энэхүү маргаанаас хойш ажлын хэсэг юу болсон хийгээд хуулийн хэрэгжилт аль түвшинд яваа талаар нам жим болсон. Тиймээс энэ асуудлын хүрээнд Хууль зүйн яамны дэд сайд Э.Эрдэнэжамънгаас зарим зүйлийг тодрууллаа.

-Эрүүлжүүлэх байрны асуудал нэг хэсэг хурц тавигдаж байгаа нам жим болчихлоо. Хуулийн хэрэгжилт хэр байгаа вэ?

-Эрүүлжүүлэх байрны асуудал бол өөрөө их нарийн. Манай цагдаа дэндүү олон үүрэгтэй байсан. Адаглаад баар, цэнгээний газруудыг хаалгахаас эхлээд хүнийг эмчилдэг гэх мэт бүх үүргийг хэрэгжүүлдэг байсан. Тиймээс үүнийг нэг тийш болгож цагдаа нарыг яг өөрсдийнх нь үндсэн ажлыг хийлгэх нь чухал юм аа гэж үзсэн. Өөрөөр хэлбэл, цагдаа нар гэмт хэрэгтэй тэмцэж, нийгмийн хэв журмыг хангах чиглэлээр илүү анхаарлаа хандуулах чухал. Ер нь эрүүлжүүлэх гэдэг эрүүл болгоно гэсэн үг. Үүнийг эмч хийх л ёстой. Цагдаа бол гудамжинд ухаан мэдрэлээ алдсан, гэр орондоо агсам согтуу тавиад бусдын амгалан тайван байдлыг алдагдуулсан хүмүүсийг албадан саатуулж, арга хэмжээ авна.  Харин бусдад гэм хор учруулахгүйгээр архидан согтуурсан, ухаан мэдрэлээ алдсан хүмүүсийг Эрүүл мэндийн яам хариуцах ёстой.

Гэхдээ энэ асуудлыг шийдэхэд байр, ажиллах баг, үйлчилгээний зардал гэх мэт олон асуудал бий. Энэ асуудлыг хангахын тулд бэлтгэлээ хийгээд л явж байгаа.

-Тэгэхээр яг хэзээнээс хэрэгжээд эхлэнэ гэсэн төлөвлөгөө бий юу?

-Энэ оноос эхлээд хэрэгжиж эхлэх ёстой. Гэхдээ хэрэгжиж эхлэнэ гэдэг ЭМЯ хэр хурдтай асуудлыг шийдэх вэ гэдгээс л шалтгаална. Хуулийн хэрэгжилтийг биелүүлэх төсөл мөнгө нь бүрдсэн үү гээд асуудал их л байгаа байх.

-Анхнаасаа л энэ шийдвэрийг эмнэлгийн ажилчид, сайд өөрөө дэмжихгүй байсан. Тэр асуудал намжсан уу?

-Ер нь Эрүүлжүүлэх байранд ажиллах нөхцөл үнэхээр хүнд. Жишээлбэл, эрүүлжүүлэх байранд олон жил болсон манай цагдаагийн ажилчид бүгд элэгний, уушигны өвчтэй болчихсон. Тэнд ажиллах маш хүнд. Үнэр танар, нөхцөл байдал хэцүү. Тиймээс үүнийг мэдэж байгаа эмч нар дуртай байхгүй нь ойлгомжтой. Тэгэхээр эмч нарыг ээлж, ээлжээр байршуулах уу мэргэшүүлэх үү гэх мэт янз бүрийн гаргалгаа байж болох юм. Мөн хувийн байгууллагад үйлчилгээний хөлсийг нь өгөөд хийлгэвэл ямар бэ гэх санаа ч гарч байгаа. Хувийн байгууллага төлбөрийг өндөр аваад гадны орон шиг явая гэхээр эрүүлжүүлэгдэж байгаа хүмүүс төлбөрийн чадвартай байх уу гэдэг сонин.