Улсын Ерөнхий Прокурорын 01 тоот албан даалгаварыг хэрэгжүүлэх ажлын хүрээнд Сэлэнгэ аймгийн прокурорын  газар, тус аймгийн Цагдаагийн газартай хамтран  Хууль Сахиулахын Их сургуулийн багш нарыг урьж сургалт зохион явуулжээ.

Сургалтанд  Хууль сахиулахын их сургуулийн багш цагдаагийн дэд хурандаа н.Алтангэрэлгомбо, цагдаагийн ахмад н.Алтантуяа нар уригдан ирж, Сэлэнгэ аймгийн 10 прокурор, 3 туслах ажилтан, цагдаагийн 30 гаруй мөрдөн байцаагчид оролцож хууль эрх зүйн онолын мэдлэгээ ахиулсан байна.

Тус сургалтын хүрээнд цагдаагийн дэд хурандаа н.Алтангэрэлгомбо, “Хэргийн газар үзлэг хийхэд анхаарах зарим асуудал”, цагдаагийн ахмад н.Алтантуяа “Гэмт хэрэгтэй тэмцэх үйл ажиллагаанд кримнологийн гүйцэтгэх үүрэг” сэдвээр хичээл заажээ.

Хууль Сахиулахын Их сургуулийн багш цагдаагийн дэд хурандаа н.Алтангэрэлгомбо хэргийн газрын үзлэг хийхэд гардаг нийтлэг алдааны талаар ярихдаа  Онц хүнд гэмт хэрэг болон хүн амины хэрэг дээр тухайн хэрэгт ач холбогдолтой шинжээчдийг оролцуулах нь хэргийг илрүүлэхэд  үр дүнтэй байдаг. Жишээ нь галт зэвсэг хэрэглэж хүний амь насыг хохироосон байвал тухайн хэрэг дээр галт зэвсгийн шинжээч оролцуулах шаардлага гардаг. Тэрээр хэргийн газрын үзлэг хийх явцдаа  хэргийн газрын хамгаалалт хангалтгүй, олон хүний бүрэлдэхүүнтэй хэргийн газар очих нь хэргийн ул мөр балрах эрсдэлтэй байдгийн анхаарууллаа. Хэргийн газраас авсан эд мөрийн баримтыг ямар эх сурвалжаас авсан талаар тогтоолд  бичихгүй байх нь манай мөрдөн байцаагчдийн дунд гардаг нийтлэг алдааны нэг гэдгийг дурьдаад  цаашид хэргийн газраас авсан хурууны мөр зэргийг хаанаас ямар эх сурвалжаар авсан тухайгаа тогтоолд заавал бичиж байхыг зөвлөлөө.

Цагдаагийн ахмад н.Алтантуяа мөрдөн байцаагч, шинжээчдийн хоорондын уялдаа холбоог хэрхэн сайжруулах, шинжээчид тавих асуултыг хэрхэн боловсруулах талаар  сургалтыг явууллаа. Тэрээр цагдаагийн байгууллагын дэргэдэх сэтгэл зүйчдийн үүрэг хариуцлагыг дээшлүүлэх, ялангуяа хүнд гэмт хэрэг буюу хүн амины хэрэг дээр ажиллаж байхад хохирогчийн гэр бүлийнхэнтэй харилцахад сэтгэл зүйчийн үүрэг  оролцоог нэмэгдүүлэх нь мөрдөн байцаалтын ажиллагаанд үр өгөөжтэй байдаг байна.

Орон нутагт эрүүгийн хэрэгт сэтгэл зүйчийн оролцоог зохицуулсан журамгүйгээс  байцаан шийтгэх ажиллагаанд сэтгэлзүйч оролцуулсан тохиолдол гараагүй ба  зарим тохиолдолд прокурор энэ үүргийг гүйцэтгэхэд хүрдэг байна.

Мөн хэргийн газраас гарын мөр бэхжүүлж авах ажиллагааг хурууны хээ гэж буруу нэр томьёо хэрэглэх тохиолдол гардаг байна.

Сургалтын хоёрдугаар хэсэгт сургалтанд хамрагдсан хийт прокурор, мөрдөн байцаагч нарыг  долоон баг болгон хэргийн газрын үлгэрчилсэн загвар ашиглан хэргийн газрын тэмдэглэл хөтлүүлэн, түүнийгээ хэлэлцүүлсэн нь ихээхэн ач холбогдолтой, алдаа оноогоо шүүсэн үр дүнтэй сургалтын хэлбэр боллоо.

Хууль Сахиулахын Их сургуулийн багш нараас сургалтанд хамрагдсан зарим прокурор, мөрдөн байцаагч нар өөрсдийн сонирхсон асуултандаа тодорхой хариултыг авсан байна.