Домогт их аварга Дагвацэрэнгийн Хадбаатарын амьдралын ээдрээ зөрчил, тэмцэл нөхөрлөлийн талаар намтарчилсан уран сайхны кино бүтээхээр төсөл эхлүүлжээ.

Тус киноны найруулагчаар Ж.Сэнгэдорж, Н.Наранбаатар, продюсерээр П.Даваажав, Б.Тогтохдэмбэрэл нар ажиллах бол кино зохиолыг Д.Энхболдбаатар бичиж эхэлсэн байна. Өвөрмонгол, Тува, Буриад, Халимаг улсын уран бүтээлчидтэй хамтран бүтээх уг кино төслийн ерөнхий танилцуулгыг хүргэж байна.

Төслийн зорилго

Монгол төрийн наадамд цоллуулж явсан, Монгол төрийн шоронд яллуулж ч явсан домогт, хүчит аварга Дагвацэрэнгийн ХАДБААТАР агсны амьдралын ээдрээ зөрчил, сургамжаар дамжуулан хүн чанар болоод нийгмийн хүрээллийн далд тэмцэл, нөхөр, дайснаа ялган танихын ухаан, цаг үеийн хүлээс хийгээд ялах, ялагдахын учир шалтгааныг кино урлагийн хэлээр дэлгэн харуулахад төслийн зорилго оршино. Амьдралын чанар, хэрэглээний ондлог, цаг үеийн сэтгэл зүй хичнээн өөрчлөгдөн хувьсавч сэтгэл ийн харилцаанд холч тэнүүн хандаж, андын нөхөрлөл, багш шавийн барилдлага хэлхээгээ эрхэмлэж, зөөлөн сайхан, зөв сайнд тэмүүлж, сэтгэлийн хир хилэнцийг тэвчин, нэг нэгнээ гэх уужим хатан чанартай амьдардаг Монгол хүний мөн чанар хэзээ ч хувиршгүй агаад хүчирхэг болохыг “Хадбаатар” уран сайхны кино үндсэн утга санаагаа болгож байгаа юм.

Ерөнхий мэдээлэл

Шоронгийн амьдрал, бохийн ертөнц хоёр “хүчит аварга” Д.Хадбаатарын цадиг, намтрын салшгүй хэсгүүд юм. Тийм ч учраас киноны үйл явдал эдгээр объектуудын сүлэлдээн дунд өрнөнө. Киноны үндсэн үйл явдлууд 1970, 1980-аад оны хооронд болж буй нь хүн ба цаг үе, нийгмийн үзэл суртал, хамгийн гол нь нэр алдар, цол гуншингийн төлөөх далд тэмцлийн ээдрээ сүлбээг илэрхийлэх хамгийн тохиромжтой цаг хугацаа юм. Монголын уламжлалт наадмын сүр хүч болсон үндэсний бөхийн ертөнц чухам энэ л үеэс найраа, булхайд автаж эхэлснийг эрдэмтэн судлаач нар тэмдэглэдэг. Бөхийн ертөнцөд бусдын нүднээс далдуур өрнөдөг тэмцлийн золиос болж, хохирсон хүмүүсийн хамгийн тод жишээ нь Д.Хадбаатар аварга юм. Гэлээ ч тэр хэнд ч муу санаж, өс зангидаж яваагүй. "Хүчит аварга” гэж хүлээн зөвшөөрөгдөх хэмжээний хүч чадалтай байсан ч тэр өөрөөсеө дор, сул дорой хүмүүсийг энэрч, тусалж явснаас бус эрэлхэж, дээрэлхэж байгаагүй. Түүнийг хүмүүс гэнэн тэнэг гэлцдэг ч үнэндээ тэр бусдад итгэх итгэлээ гээгээгүй л хүн. Тэр хохирч, ялагдаж, яллуулж амьдарсан ч гэлээ хүнээрээ үлдсэн юм.