Зүүн аймагт гарсан малын шүлхий олон малчны хотыг харлуулж байгаагийн зэрэгцээ олон улстөрчдийн түрүүвчийг зузаатгаж эхэлсэн мэдээлэл ирлээ. Учир нь вакцин оруулж ирнэ гэдэг ихээхэн лобби шаардсан ажил гэж эх сурвалж мэдээллээ. Тиймээс зүүн аймагт гарсан малын шүлхийг дарах вакцинийг хаанаас авах талаар салбарын яам хэдэн хэсэг хуваагдаж маргалдсан байна. Эцэст нь Монгол нутагт хэрэглэхийг хориглосон вакцинийг оруулж иржээ. Нэгэнт манай улсад хэрэглэхийг хориглосон учир эмийн бүртгэлд багтаагүй аж. Гэвч ийм вакцинийг оруулж ирэх эсэх дээр хөдөө аж ахуйн салбарынхан хоёр хэсэгт хуваагдсан гэнэ. Тэгэхдээ оруулж ирэхгүй гэж эсэргүүцсэн зарим хүмүүсийг ажлаас нь чөлөөлөн байж асуудлыг шийдвэрлэжээ.

Эмийг Монгол Улсад хэрэглэж болох эсэхийг шийдэж бүртгэдэг зөвлөл гэж бий. Тэдний ихэнхи нь одоогийн оруулж ирж байгаа вакцинийг эрс эсэргүүцжээ. Ийм байдал үүсэнгүүт эсэргүүцэл гаргасан хүмүүсийг чөлөөлөөд оронд нь өөр хүмүүс оруулчихжээ. Ингээд зүүн аймагт гарсан малын шүлхийг дарах зориулалттай вакцинийг орж ирэхээс нь хоёр хоногийн өмнө Монголын эмийн бүртгэлд бүртгэсэн гэдгийг эх сурвалж онцолж байна.

Тэгээд л улс төр бизнесийн бүлэглэл санасандаа хүрсэн байна. Харин энэхүү асуудлын талаар нэр бүхий эрдэмтэд, хөдөө аж ахуйн яамны мэргэжилтнүүд ихээхэн гомдолтой байгаа аж. Тэд мал аж ахуйн салбарт улстөрч бизнесменүүдийн нөлөөлөл тасраагүй цагт монголын мал эрүүлжихгүй гэсэн том дүгнэлтийг хийж удахгүй хэвлэлийн бага хурал хийхээр бэлтгэж эхэлжээ.

Сонирхолтой нь энэхүү маргаантай асуудлын талаар салбарын яам албан ёсоор мэдээлэл хийгээгүй л байна. Тэд “Шүлхийтэй махыг эдийн засгийн эргэлтэд оруулж болох” талаар дуулиант мэдэгдэл хийгээд сураг алдарсан. Харин салбарын эрдэмтэд монголд хэрэглэхийг хориглосон, орж ирэхээс нь хоёр хоногийн өмнө эмийн бүртгэлд оруулсан  вакцины талаар мэдээлэл хийж, тэрхүү шахааны бизнес нь үр нөлөөгөө өгөхгүй бол ихээхэн асуудал үүсэх нөхцөл бүрдээд байна.