Жил бүр хурдан морины унаач хүүхдүүд гэмтэж бэртсэн цаашилбал амь насаа алдсан харамсалтай хэргүүд гардаг. Тэгвэл энэ жил унаач хүүхдүүдийг хэрхэн хамгаалах талаар Хүүхдийн төлөө үндэсний газрын дарга И.Нарантуяагаас дараах тодруулгыг авлаа.

-Улсын хэмжээнд жилд хичнээн хүүхэд хурдан морь унаж байна вэ?

-Жилдээ 16 мянган хүүхэд хурдан морь унаж байна. Давхардсан тоогоор 47 мянга гаруй хүүхэд хурдан морь унадаг гэсэн тоо баримт байгаа. Үндэсний ёс заншил уламжлалтай холбоотой учраас бид үүнийг хязгаарлаж чаддаггүй. Хуулийн эрх зүйн үндэслэлийг нь ч тавьж өгөөгүй.  Тиймээс бид энэ морин уралдаанд оролцож байгаа хүүхдүүдийн эрх ашгийг хамгаалах осол гэмтэл гаргахгүй байх вэ гэдэгт анхаарал хандуулсаар ирсэн. Энэ хүрээнд бид унаач хүүхдийн хамгаалалтын хувцас хэрэглэлийг нэг номерын асуудал болгон тавьдаг.

-Хамгаалалтын хувцас хэрэглэлийн стандартын талаар ярихгүй юу?

-2010 оноос хүүхдийн стандартын хувцасыг хэрэглэж эхэлсэн. Энэ хувцасыг янз бүрийн материалаар хийж, худалдан борлуулсан асуудал гардаг. 2012, 2013 онд бид стандартын шаардлагыг маш өндөр тавьсан. Тухайлбал, өвдөг, тохойвч, чээживч, малгай гэсэн хамгаалалтууд байгаа. Тэрхүү хамгаалалтуудын зөөлөвч хүүхдийг унахад доргилтоос сэргийлэх чадвартай байх ёстой. Гэтэл эцэг эхчүүд болон уяач нар тэр бүр хүүхдүүдэд сайн чанарын хувцас хэрэглэл авч өгөхгүй байна. Энэ жил бид илүү чанартай хувцас хэрэглэл өмсөх шаардлага тавьж ажиллана.

-Хүүхдүүд бэртэж гэмтэх амь насаа алдах тохиолдол буурахгүй байгаа?

-Жил бүр унаач хүүхдүүд осолдож гэмтэх, амь нас эрдсэн явдал гарсаар байгаа. Тэдгээрээс үнэхээр эрүүгийн хариуцлага хүлээлгэх шаардлагатай хэргүүд нь хууль эрх зүйн үндэслэлээрээ тогтоогдоод явна. Ийм хоёр хүүхдийн хэрэг байгаа. Өвөрхангай аймгийн морин уралдааны үеэр унаж бэртэн амиа алдсан хүүхдийн асуудалд хуулийн байгууллага шийдвэрээ гаргасан. Ер нь бид хүнд, хөнгөн бэртэл авсан хүүхдүүдийн дахин уралдаанд оролцуулахгүй байх нөхцөлийг тавьсан байгаа.

-Нэг хүүхэд хэт олон насны морь унадаг. Энэ талаар?

-Морь унаж байгаа хүүхэд нэг насны морь унана гэж байхгүй. Ихэвчлэн 5-6 насны морь унадаг. Үүнийг болиулах талаар бид судалж байна. Өнөөдрийн хувьд нэг хүүхэд 5 хүртэлх насны морийг унаж байгааг бид хүүхдийн эрх зөрчиж байгаа онцгой нөхцөл гэж үзэж байна. Үүний эрх зүйн орчныг нь бий болгох тал дээр анхаарч ажиллана.

-Та унаач хүүхдийн даатгалыг хэр үр нөлөөтэй гэж үзэж байна вэ?

-Даатгалын хувьд эцэг эх, асран хамгаалагч нь хариуцаж даатгал хийдэг. Бид ямар ч байсан унаач хүүхдийн асуудлыг даатгалтай холбож хариуцлага тооцно. Хүүхэд эрүүл мэндээ алдсан тохиолдолд даатгалын систем эрүүл мэндийн даатгалыг хангалттай олгодог ийм системд орохоор ажиллаж байна. Даатгалын мөнгө дүнг эцэг эхчүүд өөрдсөө тогтооно. Энэ нь хүүхдийнхээ асуудлыг өөрсдөө шийднэ гэсэн үг.