-Юуны түрүүнд “Цэн тогоруу” киноны ажил одоо хэдэн хувьтай явж байна вэ? Нээлтийн тов гарсан байсан. Киногоо хугацаандаа нээх үү?

-Тэгнээ. 9 сарын 12 нд нээнэ. Яг одоо бид киногоо нямбайлан хянаж байна.

-Киноныхоо зохиолыг ахтайгаа хамтран бичсэн гэсэн. Тэгвэл энэ киног хийх санаа сэдэл анх хэрхэн төрж байсан бол?

-Ах бид хоёр өөрсдийхөө үеийн залуусын  сэдвээр  зохиол бичье гэж эртнээс ярьдаг байсан л даа.  Тэгээд  жилийн өмнөөс цаасан дээр буулгаж эхэлсэн. Залуус гал халуун хайраар учирч баяр баясал, гайхалтай агшнуудыг хамтдаа амсдаг ч бас бэрхшээл зовлон, хүсэл хяслыг  туулдаг. Амьдрал өөрөө  баян болохоор  бидэнд адал явдал санаандгүй зүйлийг байнга бэлэглэдэг.

-Зарим хэвлэлээр таныг киногоо Америк маягаар хийж байгаа гэж байсан?

-Хаана тэгсэн байна? (инээв). Би ирэхээсээ өмнө  америкт хэд хэдэн богино кино хийсэн. Энд ирээд тэр арга  барилаараа  зураг авалтын  төлөвлөгөө, зохиолоо  гаргаж  группийхэндээ  тарааж өгөхөд  манайхан ийм санаа хэлж байсан юм байна.

-Кино сайн болно гэдэг кино групп буюу баг хамт олонтой салшгүй холбоотой. Танай киноны хувьд маш олон сайхан уран бүтээлчдийг хамруулсан байсан. Тэднийхээ талаар ярихгүй юу?

-Тэр үнэн шүү. Кино гэдэг өөрөө  олон хүний хүч хөдөлмөрийг зангидаж бүтдэг. Манай кинонд Э.Идэрболд, Б.Баянмөнх, У.Батбаатар, Б.Оюун-Эрдэнэ гээд жишигнэсэн залуус тоглосон. Үүний зэрэгцээ тайз дэлгэцийн томчуул ажиллалаа. Жишээ нь АЖ Д.Мэндбаяр, МУГЖ  Н.Батцэцэг, МУГЖ  Д.Гүрсэд, МУГЖ Б.Магсаржав, МУГЖ Н.Нэргүйбаатар гээд. Бас  дууны шүлгийг ТШ-т яруу найрагч Д.Бавуудорж, аяыг Ш.Өлзийбаяр нар бичиж  дуучин П.Идэржавхлан дуулсан. Мөн дээр нь дэлгэцийн ар талд маш олон залуус ажилласан. Бүгдэд нь  баярласнаа илэрхийлье.
-Ярианыхаа сэдвийг өөрчилье. Та найз бүсгүйтэй юу?

-Одоогоор үгүй.

-Тэгвэл та ямар эмэгтэйг сайхан гэж боддог вэ? Ирээдүйн эхнэрээ ямар байгаасай гэж бодож байна?

-Өндөр боловсролтой,  ухаалаг, айл гэрийн амьдрал, эр хүнийг аваад явчихдаг  яг миний  ээж шиг хүн байгаасай гэж боддог.

-Та Америкт олон жил амьдарлаа. Ер нь Америк охидууд монгол охидоос юугаараа ялгаатай санагддаг вэ?

-Монгол  эмэгтэйчүүд гэр бүл үр хүүхдийнхөө төлөө өөртөө байгаа бүхнээ зориулдаг.  Тэд үнэхээр  ажилсаг. Америк охидуудын хувьд өөрийгөө хөгжүүлэх цаг заваар илүү хангагдсан байдаг л даа. Ер нь сэтгэхүйн хувьд  ялгаа бий бий.

-Залуу хүний хувьд хааяа шоудана л биз. Монголд ирснээсээ хойш хэр их шоудаж байна вэ?

-Энд ирээд шоудаагүй. Бараг онгоцноос буунгуутаа уран бүтээл рүүгээ орсон. Өнгөрсөн гурван сард ямар ч зав байсангүй. Ганц нэг удаа  найз нөхөдтэйгөө уулзаж ярьж суусан.

-Та ер нь муу зуршилтай юу?

-Ямар зуршил аа? (инээв). Аав огт  архи  амсдаггүй болохоор ч  тэр үү,  би  бас тааруу. Тамхи бол огт татдаггүй.
-Таны ах болон та аавынхаа мэргэжлийг өвлөн авсан. Чухам яагаад найруулагч мэргэжлийг сонгох болсон юм бэ? Энэ мэргэжлийн юу нь таныг татав?

-Өөрийнхөөрөө уран бүтээлээ хийж, өөрийгөө харуулж чадах том боломж учраас энэ мэргэжлийг сонгосон. Би  хүсвэл өөрийгөө дэлхийн хэмжээнд ч харуулж болно шүү дээ.
-Тэгвэл ээж, аав хоёрынхоо аль кинонд нь илүү дуртай вэ?

-“Жинжиймаа”-д.

-Таныг монголын хамгийн сайн найруулагч болон зураглаачийг нэрлэ гэвэл та хэнийг нэрлэх вэ?

Төрийн шагналт, УГЗ  Б.Балжинням гуайг цаг үеийнхээ гайхалтай найруулагч-оператор гэж боддог.  Ээж аавтай минь хамт олон кино хийсэн УГЗ Г.Маш зураглаач гар дээрээс их сайн авдаг, сайхан уран бүтээлч. Залуучуудаас  найруулагч Н.Наранбаатар, Б.Чингүүнжав, Сэнгэдорж гээд байна. Зураглаачид гэвэл Баттулга, Ангараг, Б.Отгонзориг нар байна.

-М.Ивээл найруулагчийн хэтийн зорилгыг сонирхож болох уу? Ер нь хамгийн том мөрөөдөл тань юу вэ?

-Эр хүний дотор эмээлтэй хазаартай морь гэдэг биз дээ. Би дэлхийн хэмжээнд монгол хүний нэрийг дуурсгахыг мөрөөддөг. Яг Түвшинбаяр шиг!

-Тэгвэл залуу найруулагч маань амьдралдаа юуг чухалчилж үздэг юм бол?

-Хүнлэг байхыг эрхэмлэдэг.

-Цаг заваа гарган бидэнтэй ярилцсанд баярлалаа.