Хамтарсан Засгийн газраас гарна хэмээн АН мэдэгдэл хийсний дараа Хонконгийн хөрөнгийн биржид “Mongolian mining corporation” нэртэйгээр гарсан манай "Энержи ресурс" компанийн хувьцааны үнэ огцом унажээ. Өчигдөр буюу нэгдүгээр сарын тавны өдөр хувьцааны ханш нь  -1,533 хувиар буурсан байна. АН-ын өдрийн 11 цагийн үед хийсэн мэдэгдлийн тухай “Ройтерс”, “Синьхуа” зэрэг томоохон агентлагууд тэр даруй дэлхий нийтэд мэдээлсэн байв. Тавантолгойн ордын Ухаа худагийн хэсэгт эрчимтэй олборлолт явуулж буй "Энержи ресурс" компани 2010 онд Хонконгийн биржид хувьцаагаа гарган арилжаалж эхэлсэн юм. Энэ компанийн нэгж хувьцаа өнгөрсөн жилийн хоёрдугаар сард 11 хонконг доллар хүрч байсан бол өнөөдөр зургаан хонконг доллараар арилжаалагдаж байна. Өмнө нь нэр бүхий есөн гишүүн Оюутолгойн гэрээнд өөрчлөлт оруулах ёстой хэмээн Засгийн газрыг огцруулах өргөх бичиг барьсаны дараа дэлхийн зах зээл дээр Монголын компаниудын хувьцааны ханш мөн огцом унаж байсан билээ. Тэр үед ч мөн “Mongolian mining corporation”-ы хувьцаа долоон хонконг доллар байсан нь 6,25 болон буурч байв. Тэгвэл өчигдөр АН-ын дарга Н.Алтанхуяг хамтарсан Засгийн газраас гарахаа мэдэгдсэний дараа 6,10 байсан нэгж хувьцаа нь 5,85 болжээ. Харин Лондоны хөрөнгийн биржид арилжаалагддаг Монголын "Петро Матад" компанийн хувьцаа өчигдөр болон өнөөдөр бага хэмжээний өсөлттэй гарсан бол Монголд уул уурхайн үйл ажиллагаа явуулдаг бусад компанийн Хонконг, Австралийн биржид буй  хувьцааны ханшид бууралт ажиглагдсангүй.