Сууц өмчлөгдийн холбоодын тухай 23 гомдлыг Шударга өрсөлдөөн, хэрэглэгчийн төлөө газрынханд ирүүлснээс 19-ийг нь шалгажээ. Энэ удаад хувийн байрнуудын халаалтын болон халуун ус байнга тасардаг, төлбөр хураамжийг тодорхойгүйгээр нэмдэг гэх гомдлын мөрөөр ажиллалаа. Шалгалтын хэсэг дулааны доголдлыг СӨХ-тэй бус харин дундын өмчлөлийн халаалт буюу ОСНААК-ийн үйл ажиллагаатай холбон тайлбарласан юм. Улсын хэмжээнд 610 СӨХ байдгаас Улаанбаатар хотод 485 нь ажилладаг аж. Нийслэлийн СӨХ-дын дундын өмчлөлийн халаалт-шугам сүлжээ муудан эдэлгээ даахгүй болсон байна. Эдгээрт засвар үйлчилгээ хийгээд ч хангалттай сайн үр дүн гардаггүй аж.

    Үүнээс гадна СӨХ-г байгуулах ажилд иргэд оролцдоггүй учир хяналтгүйгээр, цөөхөн хүний үзэмжээр гишүүдийг бүрдүүлэх болдог байна. Ингэснээр хууль бус ажиллагаа эрхлэх нөхцөл бүрддэг гэж шалгалтын хэсэг дүгнэжээ. Тиймээс нийт гомдлын дийлэнхийг эзэлж байсан үндэслэлгүй төлбөр тооцооны тухай асуудал гарчээ. СӨХ-ны дээд зөвлөл хэмээх байгууллагад нийслэлийн 393 СӨХ гишүүнчлэлтэй байдаг. Дээд зөвлөлөөс тогтоосон журмын дагуу лифт, цэвэрлэгээ, харуул, жижүүр, засвар үйлчилгээ, баримтын гэхчилэн хураамжид нийт 3000  орчим төгрөг иргэдээс авах ёстой. Мөн энэ мөнгөнөөс цахилгаан, дулааны төлбөр ня-бо, захирал, жижүүрийн цалинг гаргадаг журамтай гэнэ. Жишээлбэл, СӨХ-ны захирал 200 000 төгрөг, жижүүр нь 120 000 төгрөгийн цалин авдаг байна. Гэвч сүүлийн үед баригдсан томоохон орон сууц, хотхон хэлбэрийн байрны СӨХ-д оршин суугч, удирдах зөвлөлтэй хэлэлцээд төлбөр хураамжийг 150 000 хүртэл төгрөгөөр тогтоодог жишиг үүсчээ. Хэдий харилцан зөвшилцсөн ч СӨХ болон иргэд хоорондын харилцаа муу байгаа учир хүмүүс эргэлзэх, хууль бус төлбөр гэж хардах, мөнгийг буруу зарцууллаа гэх зэрэг маргаан үүсдэг гэж шалгалтын хэсэг дүгнэлээ.

   Ингээд бүх асуудал ганц СӨХ-д бус иргэдэд ч байгаа гэдгийг шалгалтаар харуулсан байна. Уг шалгалтыг цаашид ч үргэлжлүүлэн хийхээр Шударга өрсөлдөөн, хэрэглэгчийн төлөө газрынхан төлөвлөжээ.