Цагдаагийн Ерөнхий газрын Хэвлэл мэдээллийн төвөөс алга болсон хүүхдүүдийг олж байгаа ч иргэд мэдээллийг бүрэн гүйцэд авч чадахгүйгээс болж хүүхдүүдийг огт олохгүй байгаа мэт "алга болсон" зарлалыг бусдад тараасаар байгаа аж. Улмаар алга болсон хүүхдийг хэдхэн цагийн дараа олчихсон байхад огт олдохгүй байгаа мэт уг зарлалыг цахим ертөнцөөр тараасаар байдаг гэнэ. Тиймээс  энэ талаар ЦЕГ-аас мэдээлэл өглөө. Энэ үер хэвлэл мэдээллийн  төвийн дарга, хурандаа Б.Баатархүүгээс зарим зүйлийг тодрууллаа.

-Хэчнээн хүүхэд алга болж, хэдийг нь олсон бэ?

-Хүүхэд алга болсон, төөрсөн, ирэх ёстой хугацаандаа ирээгүй байна гэсэн мэдээллүүд Цагдаагийн байгууллагын 102 тусгай дугаарын утсанд ирдэг. Мэдээллийн дагуу цагдаагийн албанаас эрэн сурвалжлах ажиллагаа явуулдаг. Сүүлийн үед иргэд өөрсдийн хүүхэд бболон гудамжинд хайж байна гэж тавьсан зарын зургийг аваад фэйсбүүк болон твиттер хуудсандаа байрлуулаад, энэ нь олон нийтэд хүрээд явж байна. Тухайлбал 2014 оны есдүгээр сарын 4-нд алга болсон хүүхэд  тэр өдөртөө манай Сонгинохайрхан дүүргийн цагдагийн алба хаагчид олоод өгчихсөн. Гэтэл өнөөдрийг хүртэл  10 гаруй мянган хүн фэйсбүүк, твиттертээ шэйр хийгээд явж байна. Харин олсон гэсэн мэдээллийг хоёр хоногийн хугацаанд дөрөвхөн хүн шэйрлэсэн байгаа юм. Тиймээс энэ асуудал иргэд болгоомжтой хандмаар байна.

-Танайхаас алга болсон хүүхдийг олсон  гэдгээ мэдэгдэхгүй байгаагаас ийм байдал үүсээд байгаа юм биш үү?

-Төөрч байгаа хүүхдүүд хоногтоо, нэг хоногтоо олддог гэх мэтээр янз бүр. Олон нийтийн сүлжээгээр зураг нь яваад байгаа хүүхдүүд бүгд олдсон. Хүүхдээ алдсан эцэг эхчүүд айж сандарч байгааг нь олйгож байна. Гэхдээ олон нийтийн сүлжээнд мэдээлэл байршуулахаасаа өмнө цагдаагйин алба хаагчтайгаа зөвлөхийг хүсч байна. Бид Цагдаагийн ерөнхий газрын пэйж хуудсандаа алга болсон хүүхдүүдийн зургийг “Олсон” гэж тамгалаад цаашид байнга мэдээлэх болно.

-Эд эрхтэнг нь хулгайлах зорилгоор хүүхдийн хулгай их гарч байна гэж эцэг эхчүүд айх боллоо. Яг ийм төрлийн гэмт хэргийн золиос болсон тохиолдол байгаа юу?

-Өнөөдрийн байдлаар Монгол Улсад хүүхдийн эд эрхтнийг худалдаалах зорилгоор хулгайлсан гэмт хэрэг бүртэгдээгүй байна. 1988 оноос өнөөдрийг хүртэл нийт 25 хүүхэд сураггүй алга болсон гэж эрэн сурвалжлагдаж байгаа. Тэдгээрээс  Улаанбаатар хотоос 14, хөдөө орон нутгаас 11 хүүхэд алга болсон гэж эрэн сурвалжлагдаж байна.

-Хүүхэд алга болсон гэх дуудлага хоногтоо ер нь хэд ирдэг юм бол?

-Хоногтоо 8-10, заримдаа 15 хүүхэд алга болсон гэж бүртгэгддэг. Цаг хугацааны хувьд хүүхдүүд нь 10 минут болоод гэртээ ирсэн тохиолдол ч байна. Нэг хоноод ирсэн тохиолдол ч байна. Он гарсаар гэрээсээ алга болоод ноцтой гэмт хэргийг золиос болсон хүүүхдийн талаар  мэдээ алга.

-Ер нь ямар шалтгаанаар хүүхдүүд гэр орноосоо дайжиж, эрэн сурвалжлагдах дээрээ тулдаг юм бол?

- Алга болж байгаа шалтгаан нь гэр бүлийн хүчирхийлэлд байдаг хүүүхдүүд гэрээсээ дайжих, салсан эцэг эхчүүд нэгэндээ хэлэхгүй хүүхдээ авч явах гэх мэт олон төрлийн шалтгаанаас болж байна. Олон нийтийг хамарсан арга хэмжээний үед дундажаар 40-50 хүүхэд эцэг эх, асран хамгаалагчаасаа төөрөх үзэгдэл гардаг. Цагдаагийн байгууллага тухай бүрт нь олж өгч ажилладаг.

-Сүүлийн үед хар машинтай хүмүүс айлын хоёр хүүхдийг машиндаа суулгаж авч явахыг оролдсон гэх мэдээлэл олон нийтийн сүлжээгээр тархаад байна. Танайхаас шалгасан уу?

-Фэйсбүүк хуудсан дээр хар машинтай хүмүүс хүүхдийг нь машиндаа суулгаад, ээж нь гарч ирээд ноцолдоход хоёр хүүхдийг нь туранхай байна гээд машины цонхоор шидсэн гэх мэдээлэл олон нийтэд айдас төрүүж байна. Тэр мэдээлэл нь дөнгөж сая манай найзын хүүхдэд ийм зүйл тохиолдлоо гэж бичсэнээрээ илүү эмзэглэл төрүүлж байсан тул иргэд манай байгууллагад хандсан. Бид мэдээллийн дагуу шалгаад үзэхэд эх сурвалж нь тодорхойгүй, мэдээлэл тавьсан иргэн хэлэхдээ нөхрийнх нь хамт ажилладаг хүний хажуу айлд нь хоёр сарын өмнө тохиолдсон явдал гэж одоогоор хэлж байгаа. Асуудлыг шалгаж байна. Бодит мэдээлэл эсэх нь одоогоор тогтоогдохгүй байна.

Хэрвээ хүүхэд алга болбол эцэг эхчүүд өөрсдөө хайж хугацаа алддаг тохиолдол байдаг. Танй хүүхэд гэртээ очих хугацаандаа ирээгүй бол хамгийн түрүүнд 102 дугаарын тусгай утсанд хандаж, цагдаагийн байгууллгаас дэмжлэг авах хэрэгтэй. Энэ дагуу эрэн сурвалжлах ажиллагаа явуулж эхэлдэг. Мөн эрэн сурвалжлах ажиллагаа явагдаж байхад хүүхэд нь олдсон байхад эргээд цагдаад тэр талаараа мэдэгддэггүй. Тиймээс хүүхэд тань олдсон бол тухай үед нь цагдаагийн байгууллагад мэдээллээ өгч байхыг анхааруулж байна.