Интерполын товчооны ОХУ-ын Эрхүү хот дахь салбарын ажилтнууд хүн амины хэргээр олон улсад эрэн сурвалжлагдаж байсан Монголын иргэнийг өнгөрсөн долоо хоногт баривчилсанаа мэдээлэв.

   Интерполын товчооны ОХУ-ын Эрхүү хот дахь салбарын ажилтнууд хүн амины хэргээр олон улсад эрэн сурвалжлагдаж байсан Монголын иргэнийг өнгөрсөн долоо хоногт баривчилсанаа мэдээлэв. Одоогоор нэрийг нь зарлаагүй байгаа 48 настай эрэгтэй 2010 оны зургадугаар сард Монголд хүний амийг санаатайгаар хөнөөсөн хэрэгт сэжиглэгдэж байхдаа оргон зайлсан байна. Манай ЦЕГ Интерполын шугамаар түүнийг эрэн сурвалжилж баривчлах хүсэлтийг холбогдох байгууллагад хүргүүлээд байжээ. Эрхүүгийн Интерполын салбарынхан оны өмнөхөн уг этгээдийн байгаа газрын талаарх мэдээллийг авсаны дагуу тусгай ажиллагаа явуулж, Эрхүү хотын Октябрьский дүүргийн орон сууцанд нуугдаж байсан байрнаасаа оргон зайлах гэсэн үйлдэл дээр нь баривчилсан байна. “Уг этгээдийг ойрын хугацаанд Монгол улсын хууль хяналтын байгууллагад хүлээлгэн өгнө” гэж ОХУ-ын Дотоод хэргийн яамны Эрхүү хотын Удирдах газрын хэвлэлийн төлөөлөгч Герман Струглин өнөөдөр хэвлэлийнхэнд мэдэгдсэн байна.