Өнгөрсөн 2011 оноос хойш нэлээд ам татлаад буй Солонгос эзэнтэй гэгдэх “Бэгдү” констракшний барилга өнөөдөр ч хэл ам дагуулсаар байна. Баянгол дүүргийн 10 дугаар хороололд баригдаж буй Бэгдү констракшний барилгыг оршин суугчид эсэргүүцэн, Нийслэлийн Ерөнхий төлөвлөгөөний газраас барилгын ажлыг зогсоох акт гаргаад байгаа юм. Хэдийгээр Нийслэлийн Ерөнхий төлөвлөөгөөний газраас акт гаргасан ч барилгын ажил үргэлжилсээр байна. Тиймээс энэ талаар “Бэгдү” констракшний гүйцэтгэгчээр ажиллаж буй “Эч энд Эч” компанийн хуулийн зөвлөх Г.Батбаяртай ярилцлаа.

-“Бэгдү” констракшний барилгын ажил өнөөдрийг хүртэл маргаан дагуулсаар байна. Зөвшөөрлөө яг хэзээ авч байсан юм бэ. Яагаад ингэж хэл ам дагуулаад байна вэ?
-“Бэгдү” констракшний барилга 2001 оноос эхэлсэн. Тус констракшний зүгээс орчин үеийн “Бэгдү” хороолол барихаар тухайн газрыг бүхэлд авсан байдаг. Газрыг Нийслэлийн Засаг дарга олгосон. Хорооллоо барьж дуусгаад хэсэгхэн газарт барилга бариагүй дутуу үлдээсэн юм. Тэгээд тэндээ барилгаа барихаар барилгын ажлаа эхлүүлтэл иргэд эсэргүүцээд эхэлж байна. Анх “Бэгдү” констракшний ашиглалтад орж байхад иргэд баярлаад, талархаад байрныхаа үнийг хямдруулчих бид та бүхнийг дэмжиж ажиллана гэж ам тангараг өгч байсан. Гэтэл Солонгосын барилгын стандартад нийцүүлж барьсан барилгад орчихоод бүх амлалтаа мартаж, дараагийн барилгын ажлыг явуулахад саад учруулж байна.

-Дахин барилга барих зөвшөөрлөө авсан юм уу?
-Авалгүй яахав. Энэ оны дөрөвдүгээр сарын 23-нд Нийслэлийн Ерөнхий төлөвлөгөөний газраас тухайн барилга хоорондын зай, техник, цахилгааны хэлбэлзэл, стандарт нийцүүлсэн эсэхийг нь бүгдийг нь харж үзэж байж олгосон байдаг.

-Барилга хоорондоо 50 метрийн зайтай байх журмыг хэр хангаж байгаа вэ?
-25 метрийн зайтай. Гэхдээ энэхүү 50 метр зайтай байх журам таван давхар барилгад хамаарахгүй. Одоо баригдаж байгаа барилгын хажуугийн барилга таван давхар барилга байна.

-Яг хэдэн давхар барилга баригдаж байгаа юм бэ?
-50 айлын 12 давхар орон сууц баригдах гэж байна.

-Нийслэлийн Ерөнхий төлөвлөгөөний газар, НМХГ-аас барилгын ажлыг зогсоох тухай акт гаргасан гэсэн. Тийм байтал яагаад барилгын ажлыг үргэлжлүүлээд байна вэ?
-Нийслэлийн Ерөнхий төлөвлөгөөний газар өнгөрсөн дөрөвдүгээр сард барилгын ажил эхлүүлэх зөвшөөрөл олгосон хэрнээ одоо зогсоох тухай акт гаргачихсан. Энэ нь гэхдээ оршин суугч дөрвөн иргэний л хийж байгаа ажил. Тэд л бусдыгаа уриалан дуудаж энэхүү барилгын ажлыг явуулахад саад учруулж байна. Энэ дөрвөн иргэн Нийслэлийн Ерөнхий төлөвлөгөөний газрыг хуралдаж байхад хурал дээр нь очоод бөөн эсэргүүцэл үзүүлсэн байдаг юм. Тиймээс л Нийслэлийн Ерөнхий төлөвлөгөөний газар барилгын ажлыг зогсоох тухай акт гаргасан. Уг нь хуулийн дагуу иргэд хүсэлтээ холбогдох газруудад гаргаад тухайн газраас нь хүсэлтийг хангаж, шийдвэрлэх ёстой. Хэрвээ гаргасан шийдвэрийг аль нэг тал эсэргүүцэж байвал шүүхэд хандаад шүүх л шийдвэр гаргах ёстой. Түүнээс Нийслэлийн Ерөнхий төлөвлөгөөний газрын шийдвэр ерөөсөө эцсийн шийдвэр биш. Явцын дунд гаргадаг захиргааны акт. Акт гарлаа тухайн акт нь гомдолд гараагүй байхад хүчин төгөлдөр үйлчилнэ. Энэ тохиолдолд бид барилгын ажлаа зогсооно. Гэхдээ манай компанийн зүгээс эрх бүхий албан тушаалтанд гомдол гаргачихсан учир акт хүчин төгөлдөр бус болоод зогссон. Үйлчлэх эрх нь хязгаарлагдаж байна. Тэгэхээр энэ хугацаанд барилгын ажил үргэлжилнэ. Үүнийг л иргэд ойлгохгүй хуулийг буруу тайлбарлаад байна.

-Нийслэлийн Ерөнхий төлөвлөгөөний газрын дарга гомдлын хариуг хэзээ өгөх ёстой вэ?
-Иргэдийн санал гомдлыг хүлээн авч шийдвэрлэх хуулийн дагуу 5-20 хоногийн дотор шийдэх ёстой. Хугацаа нь дуусч байна. Хариугаа өгөөгүй байна.

-Хэрвээ барилгын ажлыг зогсоох тухай актыг хэвээр үлдээвэл барилгын ажлаа зогсоох уу?
-Харьяа шатны эцсийн шийздвэр гэж үзээд шүүхэд гомдол гаргах эрх нь нээгдэж байна. Тэгэхээр бид захиргааны хэргийн шүүхэд хандаад зогсоох тухай актыг хүчингүй болгуулна. Хэрвээ хариу өгөхгүй бол нэг сарын дотор захиргааны хэргийн шүүхэд хандах эрх нь нээгдэж байна. Энэхүү барилгыг эхлүүлэхийн тулд асар их хөрөнгө гаргаж, аж ахуйн нэгжээс зээл авсан. Манай “Эч энд Эч”  компанийн үйл ажиллагаанд сөргөөр нөлөөлж байна. Манайх гэрээ хийгээд газраас зээл аваад гүйцэтгэж байна. Тэгээд л ажилдаа орсон.

-Иргэдийн 70-аас илүүтэй хувь нь эсэргүүцэж гарын үсэг зурвал барилгын ажлыг зогсоох учиртай?
-Энэ тогтоол 2014 оны наймдугаар сард гарсан. Энэ тогтоолыг урьд өмнө нь гарсан шийдвэрүүдтэй хольж хутган буцаан хэрэглэж болохгүй. Манай барилгын ажил эхлүүлэх зөвшөөрөл дөвөрдүгээр сард олгогдсон. Тэгэхээр энэхүү тогтоол үйлчлэхгүй.  Бид энэ барилгын ажлаа үргэлжлүүлнэ. Энэ олон тэрбум төгрөгийн хохирлыг хэн төлөх юм. Иргэд хохирохгүй. Барилга баригдлаа гээд ч хохирох юм байхгүй. Бид хохирлоо хаанаас авах юм. Нийслэлийн Ерөнхий төлөвлөгөөний газраас гаргасан шийдвэрийн дагуу л  их хөрөнгө зэнлээр аваад барилгын ажлаа эхлүүлсэн.

-Тэгэхээр Нийслэлийн Ерөнхий төлөвлөгөөний газар хоёрдмол шийдвэр гаргажээ?
-Тийм. Гэтэл энэхүү ажилд Баянгол дүүргийн Засаг дарга Д.Оросоо хүртэл оролцож байгаа нь утгагүй.

-Д.Оросоогийн оролцоо?
-Д.Оросоо энэхүү барилгын ажлыг зогсооход цагдаа нарыг дайчлан оролцуул гэж өнгөрсөн есдүгээр сарын 17-ны өдөр захирамж гаргасан байна лээ. Захирамжийн дагуу цагдаа нар нь барилгын ажилд оролцоод байна. Цагдаа нийгмийн хэв журамтай л тэмцэх хэрэгтэй. Иргэдийн гомдол гаргах эрхээр биднийг эрхийг хязгаарлаж болохгүй. Д.Оросоогийн захирамж хууль зөрчсөн. Яагаад гэвэл, мэргэжлийн хяналтын газрын гаргасан актын биелэлтийг хэрэгжүүлэх үүрэг Д.Оросоод байхгүй. Тиймээс Д.Оросоогийн асуудлаар бид гомдол гаргасан.

-Хаана?
-Дээд шатных нь байгууллага буюу Нийслэлийн Засаг дарга Э.Бат-Үүлд гаргасан байгаа. Тэгэхээр бид мөн л гомдол гаргасан учраас тухайн захирамж хүчин төгөлдөр бус болж байгаа юм.