Шатахууны үнийг нэмэх шийдвэрийг Эрдэс баялаг, эрчим хүчний яамны дэд сайд Б.Ариунсан өгсөн гэж буруутгагдаад байгаа. Харин тэрбээр үүнийг эрс үгүйсгэж “Өнгөрсөн Баасан гарагийн орой бид хуралдсан гэхдээ хэвлэлээр бичсэн шиг ямар ч шийдвэр, тогтоол дээр гарын үсэг зураагүй” гэлээ. ОХУ-аас ирж байгаа үнэ, өмнөх саруудын валютын ханшийн өөрчлөлтөөс болж гарсан алдагдал компаниудыг яах аргаүй үнээ нэмэх байдалд хүргэсэн гэж мэдэгдэв. Харин Монгол банкны зүгээс үүнийг няцааж шатахууны үнийн өсөлтөөс болж долларын ханш ийм өндөр байгаа хэмээн маргаад байгаа билээ. Дэд сайдын хэлснээр өнөөдөр манайд хоёр хоногийн шатахууны нөөц байгаа аж. УИХ-аас шатахуун нөөцөл гэж нийт 16 тэрбум төгрөг төсөвлөжээ. Сангийн яамны зүгээс энэ мөнгөнөөс таван тэрбумыг нь шилжүүлсэн байгаа тул ОХУ, Хятад болон Солонгосын компаниудтай тонн тутамд 30 долларын хямд байхаар гэрээ байгуулсан байна. Таван сая төгрөгөөр 2,8 мянган тонн шатахуун авахаар болсон нь Монголын дөнгөж хоёр өдрийн нөөцийг хангах аж. Үлдсэн мөнгийг нь Сангийн яамнаас шилжүүлсэн ч 12 хоногийн нөөцтэй л болох гэнэ. Япон 180 хоногийн шатахуун нөөцөлдөг, түүнийгээ ойрын үед 240 тонн болгохоор зэхэж байгаа. Харин манай улсын хувьд түүхий нефьт боловсруулах үйлдвэрээ ашиглаад эхэлчихвэл дөрвөн аймгийг тэр чигээр нь хангах боломжтой гэдгийг УИХ-ын гишүүн Р.Буд хэллээ. Нефть агуулах сав байгуулах тухай шийдвэр аль хэдийн гарчихсан байгаа ч тендер нь зарлагдаагүй, ажил нь эхлээгүй байгаа нь мөн шүүмжлэл дагуулж байгаа юм.
Дэд сайд Б.Ариунсан нэгэнт үнэ нэмэх шийдвэр гаргаагүй гэсэн тул компаниуд дур мэдэн үнэ хөөрөгдсөн хэмээн бурууг үүрэх болоод байна.
