Сири-Туркийн орчим дахь Кобане хотыг хяналтандаа авахаар тулалдаж буй “Исламын улс” бүлэглэлийн харгислал хэрээс хэтэрч байна. Зэвсэгт дайчид дунд сургуулийн төгсөлтийн шалгалтаа өгч байсан Курд хүүхдүүдийг барьцаалж, зодож нүдэн гэрт нь буцаажээ. 

    Хэт даврагчид залуу эмэгтэйчүүд, охидыг хулгайлж боолоо болгон, өсвөр насны хөвгүүдийг олон сарын турш барьцаалж байна. Кобане хотоос баруун өмнөд зүгт 50 км-ийн зайтай орших Манбиж дахь сургуульд хөвгүүдийг олон цагаар хорьсон гэж хүний эрхийг хамгаалагч “Watch” байгууллага мэдээлэв. Хүүхдүүдийн амьдрах орчин нөхцөл улам муудсаар байна. Тэд хүйтэн шалан дээр хөнжил дэвсэн унтаж, хоёр долоо хоногт нэг удаа усанд орж, эцэг, эхтэйгээ ч утсаар ярих эрхгүй болжээ. Барьцаалагдсан хөвгүүд толгойгоо авахуулахгүйн тулд өдөрт таван удаа залбирал үйлдэж, Коран судар цээжилдэг байна. “Заримдаа биднийг ямар ч шалтгаангүй зоддог” гэж 16 настай хүү ярьжээ.