Ерөнхий сайд Ч.Сайханбилэг шинэ Засгийн газрын бүтцээр 464 орон тоог багасгаж чадвал 13 тэрбум төгрөгийг хэмнэх тооцоо байгаа гэдгийг онцлоод байгаа. Өөрөөр хэлбэл, эдийн засгийн хямралтай байгаа энэ үед төсвийг хэмнэхэд зарим яам агентлагуудын нэгтгэж,  хэрэггүй, ашиггүй гэсэн газруудыг татан буулгаж танах нь зөв гэдэг байр суурийг илэрхийлээд байгаа.  Энэ бодлогодоо ч уялуудлж  Засгийн газрын шинэ бүтцийг өргөн бариад байгаа. 

Харин түүний барьсан шинэ бүтцэд байгуулагдаад удаагүй байгаа Тахарын албыг татан буулгах санал оржээ. Ийн шинээр өргөн барьсан Засгийн газрын төрийн захиргааны тогтолцооноос Тахарын албыг хасах саналыг Ерөнхий сайд гаргасан юм.

Ч.Сайханбилэг сайд энэ талаар албан ёсны байр сууриа илэрхийлэхдээ “Төсвөө хэмнэх, төсвийн зардлыг хянахын тулд зарим агентлагт өөрчлөлт оруулах шаардлагатай байна. Хууль хэзээ батлагдсан чухал биш. Хамгийн гол нь хэрэгжилт, үр дүнгээ хэрхэн өгч байгаа нь чухал” гэв.
 Харин энэ талаар Хууль зүйн сайд Х.Тэмүүжин “Цагдаагийн байгууллага гэрчийг гэмт хэрэгтэнтэй адилхан үзэх хэмжээнд ачааллаа дийлэхгүй байгаа энэ үед Тахарын алба байх ёстой. Ер нь яагаад энэ албыг татан буулгах болов. Цагдаагийн байгууллага чинь одоо хэвийн үйл ажиллагаагаа явуулахад 1250 орон тоо дутуу явж байгаа. Үүнийг өмнөх засгийн газрын Ц.Нямдорж сайд ч хэлж байсан. Гэтэл ийм хүрэлцээгүй байгууллага дээр Тахарын албаны гэрч, хохирогчийг хамгаалах чиг үүргийг  нэмэхээр, тэд  дийлэхгүй. Гэрч хохирогчийг, шүүх үйл ажиллагааны хэвийн үйл ажиллагааг хангах чиг үүргийг байхгүй болгож болохгүй шүү дээ” гэсэн байр суурийг илэрхийлсэн.

Харин УИХ дахь АН-ын бүлгийн дарга Д.Эрдэнэбат гэрч хохирогчыг хамгаалах бүтэц нь ахицтай шинэ зүйл байсан. Тахарын албаны тухай хуулийг бүхэлд нь хүчингүй болгож болохгүй гээд “Тахарын алба 500 гаруй ажилчинтай үйл ажиллагаа нь жигдрээд явж байсан. Уг албыг татан буулгах нь буруу” хэмээсэн юм.

Мөн М.Батчимэг гишүүн “Монголын хууль гурван хоног гэдэг шиг хэрэгжээд нэг жил ч болоогүй Тахарын албыг татан буулгана гэдэг чинь юу гэсэн үг вэ. Тахарын албаны хуулийг бүгд л ярьж байгаад зөв гэж шийдсэн. Гэтэл яагаад ийм шийдвэр гаргав” гэх мэтээр байр сууриа илэрхийллээ.
Тухайлбал, Ц.Нямдорж гишүүний хувьд “Би энэ асуудлаар их олон ярьж байсан даа. Гэрч, хохирогчийг хамгаалах хуулийн төслийг чинь миний үед хийж байсан юм шүү дээ. Түүгээр бол шинэ алба байгуулахгүйгээр одоогийн цаг¬даагийн хү¬рээндээ л хамгаалалтыг нь хийгээд явах бололцоо байсан. Нөгөөтэйгүүр, Тахарын албыг 500 хүнтэй байгууллаа гэхэд Улаанбаатар хот, бүх аймагтаа хуваахаар нэг газарт хэдэн тахар байх юм. Хүн хүч нь хүрэлцэхгүй цагдаагаас л гуйна. Цагдаа нь манайд хамаагүй, асуудлаа шийд гэвэл тэгээд л хад мөргөнө шүү дээ” хэмээж байв.
Улс төрчдийн дунд нэг иймэрхүү яриа өрнөж байна. Харин ард иргэдийн дунд хоёр талын байр суурь давамгайлсаар.
Нэг хэсэг нь Тахарын алба байснаар цагдаа нарыг ажлыг хөнгөвчилж, нуруун дээрх ачааг нь багасгасан. Яалтайчгүй энэ алба байж, цаашид улам өргөжих хэрэгтэй гэцгээж байна. Гэтэл нөгөө хэсэг нь Монголд одоохондоо Тхарын алба ямарч шаардлагагүй нь үнэн.Зүгээр л татвар төлөгчдийн мөнгийг хомслод л оруулж байна. Цагдаа, Шүүхийн шийдвэр гүйцэтгэх газрын нэг нэгж болгох хэрэгтэй гэцгээж байгаа юм. Цаашлаад Х.Тэмүүжин сайд дотоодын цэрэг хэмээх 90 жилийн түүхтэй байгууллагыг тараагаад энэ Тахарын алба гээчийг байгуулсан нь анхнаасаа буруу шийдвэр байсан.  “Хэрээ галууг дуурайж хөлөө хөлдөөнө” гэгчээр гадаад орны төр захиргааны тогтолцоог дуурайх нь манайд зохимжгүй гэх мэтээр санал шүүмжлэлээ ирүүлээд байна.
Тахарын алба татан буугдвал Хууль зүйн сайд Х.Тэмүүжинг буруутгах хүмүүс олшрох нь. Тодруулбал, Тахарын алба Монгол Улсад зайлшгүй байх ёстой хэмээн зүтгэсээр байсан хүн бол Х.Тэмүүжин. Түүнийхээр ч болж Тахарын алба байгуулагдсан. Бүхэл бүтэн алба байгуулагдана гэдэг чамгүй хөдөлмөр, хөрөнгө зарцуулах нь тодорхой. Гэтэл туршилт маягаар гарч ирээд алга болдог “тоглоом” болж байгаад зарим хүмүүс ундууцах нь ойлгомжтой. Үнэхээр Тахарын алба хэрэггүй байсан бол Х.Тэмүүжин энэ саналыг гаргаж ирэх хэрэгтэй байсан юм уу?. Тиймээс ч Тахарын алба татан буугдвал Х.Тэмүүжинг буруутгах хүмүүс олшрох нь. Тахарын албыг Х.Тэмүүжинтэй холбож ойлгох хүн цөөнгүй байгаа нь магадгүй энэ байдлыг дэвэргэж байгаа байх.
Тахарын алба нь Шүүгч, шүүхийн аюулгүй байдлыг хамгаалах, гэрч, хохирогчийг хамгаалах, яллагдагч, ялтныг хуяглан хүргэх, шүүхийн дуудсанаар ирэхгүй байгаа оролцогчийг албадан ирүүлэх, эрэн сурвалжлах, мөрдөн шалгах чиг үүрэгтэй Хууль зүйн яамны харъяа агентлаг юм.

Тахарын албаны тухай хууль 2013 оны долдугаар сард батлагдаж, энэ оны нэгдүгээр сараас уг хууль хэрэгжиж эхэлсэн. Уг алба нь зургаан бүлэг бүхий ”Тахарын албаны хууль”-тай. Тахар нэгдүгээр сарын 27-ны өдрөөс үйл ажиллагаа эхэлсэн бөгөөд одоогоор 700 гаруй ажилтан, алба хаагчтай.  Тахарын албаны тухай хуулийг хэрэгжүүлэхэд байр, хүний нөөц, салбар гээд олон асуудал бий. Тиймээс ч улсын төсвөөс багагүй мөнгө зарцуулж байгаа гэдгийг эх сурвалж дурдав. Албаны эх сурвалжаас авсан мэдээллээр энэ онд 10 тэрбум төгрөг төсөвлөсөн гэдэг.

Иргэн таньд ямар сэтгэгдэл төрж байна. Энэ алба байх хэрэгтэй юу?. Эсвэл....