2013 оны тавдугаар сард Нина хөлөг Шинэ Зеландаас Сиднейг чиглэн явж байгаад хүчтэй шуурганы улмаас далайд сүйрсэн юм. Усан онгоцны зорчигчид живэх үедээ ар гэрийнхэндээ утсаар мессеж илгээсэн тухай баримтууд бий. Гэвч сүйрсэн хөлгийг Номхон далайн хагас сая миль талбайд хайгаад ямар ч ул мөр олоогүй байна. Аравдугаар сард эрлийн багийнхны хиймэл дагуулаар авсан зургаар хөлгийг олсон тухай мэдээлсэн ч батлагдаагүй ажээ. Хайгуулыг албан ёсоор зогсоосон ч хөлгийн багийн зургийн гишүүний ар гэрийнхэн итгэж найдсан хэвээр байна.

2008 онд загас агнуурын усан онгоц Номхон далайд алга болжээ. Хөлгийг галд шатсан гэдэг таамаглал дэвшүүлсэн бөгөөд дотор нь зорчиж явсан 29 Ази хүмүүсийн нэгнийх нь цогцос олдоогүй байна. Хайгуулыг 21 мянган миль квадрат талбайд хийсэн ч амжилт олоогүй ба эрэлд оролцсон гурван завь алга болжээ.

2007 онд Астралийн хойд эрэгт 140 км аялсан усан онгоц алга болж, олон хүнийг гайхшруулсан билээ. Онгоцны хөдөлгүүр, зоогийн ширээ олдсон ч зорчигчдын цогцос олдоогүй байна. Радио долгион нь бүрэн ажиллаж, интернэтэд хүртэл холбогдож байсан үйлчилгээний зориулалттай хөлөг ямар ч хэл чимээгүй алга болсон юм. Багийн гишүүдэд аврах хантааз хангалттай байсан бөгөөд сүйрэлд гуравдагч этгээдийн оролцоо байсан гэх ямар ч нотолгоо олдоогүй байна.

2003 онд High Aim 6 нэртэй загас агнуурын хөлөг Австралид ор сураггүй алга болжээ. Хөлгийн багийн гишүүд нь Индонези хүмүүс байсан бөгөөд ахмадыг нь хөнөөсөн учраас сүйрсэн гэдэг таамаглал дэвшүүлсэн юм. Онгоцны инженерийн гар утас дуудлага хүлээн авсан гэдэг мэдээлэл байдаг ч нотлогдоогүй. Эрлийг 11 мянган км квадрат талбайд үргэлжлүүлсэн ч юу ч олоогүй ажээ.

MV Joyita арилжааны усан онгоцыг Дэлхийн хоёрдугаар дайны сүүл хүртэл Хавайн аралд эргүүл, хамгаалалтын албанд ашиглаж байв. Энэ хөлөг 1955 онд Токелау арлаас 432 км-ийн зайтай орших Апиа боомтоос ор сураггүй алга болсоноос хойш хэзээ ч олдоогүй юм.

Карролл нэртэй хос дарвуулт завь 1921 онд Хойд Каролинд алга болжээ. Хөлгийн зорчигчдоос хэнийх нь ч цогцос олдоогүй хэрнээ идэж байсан хоол нь олдсон юм. Энэ ослыг Бермудын гурвалжингийн учир битүүлэг явдлын золиос болсон гэж судлаачид таамагладаг. АНУ-ын Засгийн газар усан онгоцны эрлийг 1922 онд зогсоохоор шийдвэрлэжээ.

Хүнс, унд ачиж явсан бригантин хөлөг 1872 онд Атлантын далайд сүйрсэн байна. Гибралтарын хоолойг чиглэн явсан усан онгоц багийн долоон гишүүнтэйгээ хамт хэзээ ч олдоогүй юм. Тухайн үед цаг агаар таатай байсан ч ямар ч дохио өгөлгүйгээр алга болжээ. Багийн гишүүд хоорондоо муудалцсан эсвэл далайн дээрэмчдэд барьцаалагдсан гэж үздэг. Гэвч учир нь өнөөг хүртэл тайлагдаагүй байна.